Një zjarr i përmasave të jashtëzakonshme ka përfshirë një kamp që trehonte 1500 refugjatë në veri të Francës. Kampi është shkatërruar plotësisht e mendohet se shkak i tij ka qenë një përleshje mes afganëve dhe kurdëve.
Të paktën 10 persona kanë mbetur të lënduar kur zjarri përfshiu çadrat në kampin Grande-Synthe, në afërsi të portit Dunkirk. Muajin e kaluar zyrtarët deklaruan se kampi do të çmontohej për shkak të trazirave.
Bregu verior i Francës ka qenë një magnet për emigrantët që përpiqen të arrijnë Britaninë. “Nuk ka mbetur gjë tjetër përveç hirit”, ka deklaruar Michel Lalande, prefekt i rajonit verior të Francës.
Ai është shprehur se, do të jetë e pamundur që çadrat të ngrihen sërish aty ku ndodheshin më parë.
Numri i banorëve të kampit Grande-Synthe është rritur që nga tetori i kaluar, kur autoritetet çmontuan kampin e njohur si “Xhungla”, në afërsi të lokalitetit Calais, rreth 40 kilometra larg.
Mbërritja e më shumë afganëve rriti tensionet me kurdët që jetojnë në kamp, raporton agjencia e lajmeve “AFP”, që citon dëshmitarë dhe zyrtarë.
Emigrantët janë evakuuar dhe do të dërgohen në një qendër akomodimi të improvizuar, me dy palestra që janë vënë në dispozicion për ta. (E.K/SHUPLAKA)
