SPAK ka përpiluar raportin dy mujor të hetimeve, nga ku dyshohet se një tjetër episod korrupsioni mund të jetë kryer nga Meta dhe Kryemadhi, ku shpenzimet nga një kartë e dytë bankare prej tyre kapin vlerën e 240 mijë dollarëve.
Sipas SPAK, karta bankare ishte vendosur në dispozicion për ish-çiftin, nga biznesmeni shqiptaro-amerikan Adrian Shatku.
Burime per gazetaren Bleona Prengezaj bejne me dije se për periudhën dhjetor 2014- nëntor 2017, Monika Kryemadhi dyshohet se ka shpenzuar shumën e sipërpërmendur për blerje në dyqanet e veshjeve në Londër, Vjenë, Las Vegas, Beverly Hills; pagesa të qëndrimit në hotel në Londër, New York dhe Las Vegas si dhe bileta avioni për udhëtimet.
Ish-presidenti Meta më herët ka mohuar të ketë lidhje me këtë kartë bankare duke u distancuar nga veprimet e ish-bashkëshortes. Meta u shpreh se mban përgjegjësi vetëm për veprimet e tij
SPAK ka përfunduar hetimet për dosjen CEZ-DIA, lobimin e ish-LSI në SHBA dhe hetimin pasuror ndaj Ilir Metës dhe Monika Kryemadhit.
Ish-çifti Meta-Kryemadhi, që u divorcuan pak kohë më parë, janë hetuar për korrupsion, pastrim parash, mosdeklarim e fshehje pasurie.
Kujtojmë se SPAK e akuzon Metën për veprat penale “Korrupsion pasiv i zyrtarëve të lartë shtetëror dhe të zgjedhurve vendorë”, “Pastrim i produkteve të veprës penale dhe veprimtarisë kriminale”, “Refuzim për deklarim, mosdeklarim, fshehje ose deklarim i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Sipas SPAK, janë dokumentuar disa episode ku Ilir Meta dhe Monika Kryemadhi në bashkëpunim mes tyre dhe me funksionarë të tjerë publikë janë përfshirë në kryerjen e disa veprave penale.
