Rënia e Tiranës, Salihi: Mos e quani tragjëdi, kush bie ngrihet edhe më i fortë

Sulmesi Hamdi Salihi i pyetur në lidhje me rënien e Tiranës nga kategoria është shprehur se i vinte keq por kjo nuk duhet parë si tragjedi.

Tirana sipas tij e ka forcën të ringrihet përsëri, ndërkohë që kujton se ishte ekipi që e formësoi atë si futbollist.

“Ka qenë një eksperiencë e mrekullueshme dhe shumë e mirë. Pritja nga qyteti, njerëzit dhe ekipi, nga çdo pjestar i Skënderbeut ishte e jashtëzakonshme. Jam munduar t’ia kthej në të njëjtën mënyrë. Në fillim erdha vetëm për ndeshjet kualifikuese në Champions League, pastaj shkuam në Europa League dhe për rrethana nga më të ndryshme ose vendosa të mos largohem, ose të qëndroj. Ishte vërtet diçka e bukur”, ka thënë bomber shkodran për RTSH Sport.

Salihi ka folur edhe për të ardhmen e tij dhe ka thënë se do të largohet nga futbolli shqiptar, tërheqjen nga futbolli nuk e mendon për momentin dhe karrierën do ta vazhdoj larg Shqipërisë.

“S’e kam menduar ende të largohem nga futbolli, ndaj do të provoj diçka tjetër larg kampionatit shqiptar”, ka deklaruar ai.

Për episodin e ndodhur në kukës ku ai i grisi gjyqtarit kartonin, Salihi është shprehur se ajo ishte diçka spontane dhe nuk e kishte menduar se mund të ndodhte diçka e tillë.

“Janë gjëra spontane, të fushës. Duhet të tregosh fair play dhe respekt. Nuk është se zbrita në fushë për të mos qenë i tillë, por janë momente që i kalon natura e njeriut. Ajo që ndodhi në Kukës doli spontanisht. Nëse do të kthehesha mbrapa qindra miliona herë, s’do ta kisha përsëritur”, ka thënë ish sulmuesi I kombëtares.(B.H/Shuplaka)