Kryeministri italian Matteo Renzi u takua me presidentin Sergio Mattarella për të diskutuar mbi dorëheqjen e tij pas humbjes së thellë në një referendum mbi reformat kushtetuese, që synonin shtimin e funksioneve të Parlamentit dhe dobësimin e Senatit.
Renzi ra dakord të mos e japë dorëheqjen para se të miratohet buxheti, që pritet brenda dy ditëve të ardhshme.
Kryeministri e pranoi humbjen dhe shpalli dorëheqjen në një konferencë të shkurtër dhe emocionale për shtyp, brenda dy orësh pas mbylljes së qendrave të votimit.
Ndërkaq, lëvizja populiste “Pesë yjet” e udhëhequr nga komediani Beppe Grillo, që ishte në krye të fushatës kundër referendumit, bëri thirrje, ashtu si edhe forcat e tjera të opozitës, për zgjedhje të parakohshme, pasi Renzi deklaroi dorëheqjen.
“Është koha për të bashkuar vendin që u përça nga referendumi dhe për të deklaruar zgjedhje të parakohshme, si edhe për të marrë një vendim.”, është shprehur Grillo.
Lëvizja “Pesë yjet” është rivalja kryesore e demokratëve të kryeministrit Renzi dhe ndërkohë po bën të gjitha përpjekjet për të arritur sukses në skenën politike kombëtare për herë të parë.
