Një ditë pas akuzave që shkëmbyen ambasadori amerikan Donald Lu dhe kryeprokurori Adriatik Llalla, kryeparlamentari Ilir Meta ka shprehur kërkesën e tij përmes një shkrese zyrtare duke mbajtur kështu një qëndrim publik.
Mësohet se ai ka kërkuar në shkresën zyrtare drejtuar institucionit të Prokurorisë së Përgjitshme një qëndrim institucional lidhur me procesin e përzgjedhjes së kandidaturave dhe respektimin e kritereve në përputhje me Kushtetutën dhe ligjin.
Kjo kërkesë e tij vjen pas akuzave një ditë më parë të Lu-së, i cili akuzoi Llallën për cenimin e frymës së Kushtetutës lidhur me kandidaturat e paraqitura për shortin e Këshillit të Emërimeve në Drejtësi (KED), duke propozuar vetëm tre emra.
Shkresa zyrtare u bë publike pas takimit prej rreth 30 minutash që Prokurori i Përgjithshëm, Adriatik Llalla, pati këtë mëngjes me kryetarin e Kuvendit, Ilir Meta. (XH.A/SHUPLAKA)
Discussion about this post