Pas një periudhe me temperatura të larta, moti ka ndryshuar ndjeshëm duke sjellë reshje të dendura shiu, të cilat kanë shkaktuar probleme në disa akse rrugore. Një nga segmentet më të prekura është rruga nacionale Burrel–Milot, ku gjatë natës është raportuar një rrëshqitje gurësh në hyrje të tunelit të Shkopetit.
Si pasojë, qarkullimi në këtë segment u bllokua për rreth një orë. Menjëherë në vendngjarje kanë mbërritur forcat e policisë dhe firma e mirëmbajtjes së rrugës që operon në segmentin Skuraj–Peshkopi. Falë ndërhyrjes së tyre, u bë e mundur pastrimi i gurëve dhe normalizimi i qarkullimit.
Sipas informacioneve paraprake, nga rrëshqitja është dëmtuar edhe një pjesë e murit mbajtës të rrugës, në afërsi të hidrocentralit të Shkopetit. Autoritetet po monitorojnë situatën për të parandaluar rrezikun e ndonjë rrëshqitjeje tjetër në vijim.
