Reuters i ka kushtuar një artikull të veçantë deklaratës të një dite më parë të kryeministrit të Shqipërisë,Edi Rama, përpara takimit me kancelaren Merkel. Media britanike shkruan se në fjalën e tij, kreu i Qeverisë shqiptare kritikoi vendet e huaja që ndërhyjnë në politikën e shteteve të Ballkanit Perëndimor, në një kohë kur shqetësimi për përhapjen e ndikimit rus është shtuar.
Pavarësisht se kryeministri Edi Rama nuk iu referua konkretisht asnjë shteti në kritikën e tij, dyshohet se bëhet fjalë për Rusinë, shkruan “Reuters”. Shteti rus është kritikuar vazhdimisht se po përpiqet të rrisë ndikimin e tij në vende të tilla si: Mali i Zi, Serbia, Maqedonia e së fundmi dhe në Shqipëri. “Në rajonin tonë, forca të jashtme shfrytëzojnë ndonjë pasiguri për të prishur marrëdhëniet tona me Bashkimin Europian.”, është shprehur ndër të tjera kreu i Qeverisë shqiptare përpara takimit me kancelaren gjermane Angela Merkel.
Rama theksoi se Shqipëria do të vijojë të punojë për anëtarësimin në BE. Pak kohë më parë edhe kreu i Inteligjencës në Gjermani ngriti shqetësimin se Rusia mund të përpiqet të ndërhyjë në zgjedhjet e ardhshme .
Discussion about this post