Rudina Hajdari ka dhënë një deklaratë për shtyp, pas përfundimit të mbledhjes së Komisionit të Reformës Zgjedhore.
Deputetja u shpreh se u prezantua nga ekspertët drafti i dytë për administratën zgjedhore.
Hajdari tha se drafti është një revolucion më vete, pasi flitet për një administratë të re zgjedhore.
Më tej, Hajdari thekson se do të ketë një propozim konkret nga opozita në Parlament për ndryshimin e sistemit brenda muajit nëntor.
“U prezantua nga ekspertët drafti i dytë për administratën zgjedhore. Sipas ekspertëve ky do të jetë një draft i pavarur. Aleanca e grave ishte e pranishme në lidhje me pjesëmarrje më të madhe të grave.
Është revolucion më vete, drafti për administratën zgjedhore. Është një draft tejet i rëndësishëm, flitet për një administratë të re zgjedhore. Kjo nuk do të thotë se kemi arritur një konsensus. Kemi shumë punë për të bërë.
Do të ketë një propozim konkret nga opozita në Parlament për ndryshimin e sistemit brenda muajit nëntor. Administrimi zgjedhor është tepër i rëndësishëm do të ketë sërish takim me shoqërinë civile. Drafti i parë kishte mangësi në përbërje. I kërkova eksperteve që të marrin në konsideratë seriozisht propozimet nga shoqëria civile,” u shpreh Hajdari.
Discussion about this post