Nga Konferenca e Koalicionit Global kundër Shtetit Islamik në Uashington, shefi i diplomacisë amerikane Rex Tillerson deklaroi se synimi i Amerikës është shkatërrimi i ISIS-it, por kjo nuk mund të ndodhë, sipas tij, nëse aleatët nuk pranojnë të shtojnë kontributet e tyre në këtë përpjekje.
Pas profilit të ulët publik që mbajti gjatë dy muajve të parë në detyrë, Sekretari i Shtetit rrëmbeu vëmendjen në takimin e Uashingtonit të fokusuar tek lufta kundër grupit më të egër xhihadist të momentit.
“Suksesi i misionit tonë varet nga përkushtimi i vazhdueshëm për objektivin tonë të deklaruar për të mundur këtë organizatë terroriste”, u shpreh sekretari Tillerson në hapje të takimit të Koalicionit Global kundër grupit ISIS, ku marrin pjesë ministrat e jashtëm të 68 vendeve.
Ky është takimi i parë i plotë i koalicionit kundër Shtetit Islamik që nga viti 2014. Në konferencë merrte pjesë dhe ministri i Jashtëm i Shqipërisë, Ditmir Bushati si dhe ai i Kosovës, Enver Hoxhaj. (E.K/SHUPLAKA)
