Autoriteti Kombëtar Ushqimit ka bllokuar dy ngarkesa me mish importi të sasisë 53.1 ton, i cili rezultonte i kontaminuar me salmonela typhimurium. Mësohet se mishi origjinën e ka nga Brazili dhe destinacioni ishte Shqipëria. Gjatë vitit 2018 mësohet se AKU, ka identifikuar dhe kthyer rreth 78.1 ton mish .
Në një njoftim, Autoriteti Kombëtar i Ushqimit sqaron se, “kontrollon dhe realizon analizat e çdo ngarkese mishi nga Brazili për të garantuar në mënyrë të plotë sigurinë ushqimore të produktit që importohen”.
Sipas të dhënave që jep AKU mësohet se në vitin 2017 janë analizuar 225 mostra, ngarkesat e të cilave janë analizuar nga ISUV dhe ka dalë jo konform vetëm një prej tyre. Më herët nuk rezulton për asnjë ngarkesë të identifikuar problematike.
Nga Janari e deri më sot janë analizuar mostrat e 178 ngarkesave, në total 4700 ton (mish derri, mish gjedhi, dhe mish pule) nga të cilat kanë dalë jo konform 5 ngarkesa, 130 ton prej tyre.
“AKU dhe MBZHR po kryen investigimin për origjinën e këtyre kontenierëve dhe nga ana tjetër garanton se siguria e produkteve të importuara, që qarkullojnë në tregun shqiptar është e plotë. Ky standard kontrolli i bashkohet punës së AKU për garantimin e sigurisë ushqimore në ciklin e therjes në tregun vendas”, mbyllet njoftimi i AKU-së. (E.V/FAxweb.al)
