Kryeministri i Shqipërisë Edi Rama pritet që ditën e premte të zhvillojë një vizitë në qytetin e Kukësit ku do të bëjë edhe inaugurimin për fillimin e punimeve pr ndërtimin e aeroportit në këtë qytet.
Lajmin e ka bërë të ditur Safet Gjici, një nga personat më të përfolur si kandidat për bashkinë veri-lindore në zgjedhjet e ardhshme lokale.
Gjici përmes rrjeteve sociale, ka ftuar qytetarët e Kukësit që të marrin pjesë në takimin që do të zhvillohet në vendin ku pritet të ndërtohet aeroporti, për të cilin ai thotë se në fazën fillestare do të hapë 220 vende punë ndërkohë që me finalizimin e punimeve do të punësohen 12000 njerëz.
Gjici shkon më tej duke shtuar se pas ndërtimit të këtij aeroporti i cili sipas tij ka një kosto prej 8 milionë eurosh, fluksi i lëvizjeve parashikohet të arrijë në 300 mijë pasagjerë në vit.
Postimi i plotë:
Ftoj të gjithë banorët e Kukësit, kudo që ndodhen, që të bëhen pjesë e takimit që do realizohet këtë të premte, ku do jetë i pranishëm edhe kryeministri i Shqipërisë z.Edi Rama.
Takimi do të mbahet në orën 14:30 tek Aeroporti, ku z.Rama do të inaugurojë punimet për rikonstruksionin dhe funksionalizimin e aeroportit të Kukësit.
Ky është një nga investimet më të rëndësishme për Kukësin, që do të sjellë zhvillim ekonomik e social të Kukësit tonë.
Si i tillë, prej tij përfitojnë të gjithë, ndaj ju ftojmë të bëheni pjesë e këtij eventi të rëndësishëm.
Aeroporti Ndërkombëtar i Kukësit, do të ketë një investim, ku vlera e rehabilitimit do të arrijë në 8 milionë euro.
Do punësohen, fillimisht, 220 persona ndërsa në fazën finale, 12 mijë persona.
Fluksi i lëvizjeve parashikohet të arrijë në 300 mijë pasagjerë në vit.
Ndërkohë, do të sjellë çmime të ulëta dhe shërbime cilësore.
Në flasim me vepra, jo fjalë boshe dhe përgjumje.
Synimi është puna dhe veprat, për Kukësin, jo demagogjia!
#TaGëzojmëSëBashku!
#ForcaKukësi
#MëKukësinDhePërKukësin
#PërKukësinQëDuam
#PërBashkinëQëDuam
