Rikthehet ‘arkitekti’ i gropës në ARMO, kush është zvicerani që po ‘zhyt’ sërish duart në naftën shqiptare

Shfrytëzimi i hidrokarbureve shqiptare, prej më shumë se një dekade është kthyer në një skemë vjedhjeje.

Historia nis në vitin 2008, kohë kur shteti shqiptar i jep me qira rafinerinë një kompanie “serioze”.

Kompania shfrytëzon rafinerinë, nuk paguan taksat dhe më pas largohet, duke i “hapur” rrugën një tjetër kompanie e cila vjen me të njëjtën skemë.

Revista ekonomike “Monitor” në një shkrim të disa muajve më parë ka paralajmëruar se me ARMO-n po ndodh sërish e njëjta skemë grabitjeje ku në lojë qëndrojnë fshehur aktorët e vjetër.

Njëri prej tyre, zvicerano-francezi, Cristophe François Bernard Darbord, po rikthehet  si administrator i ARMO-s, për të hapur një tjetër kapitull borxhesh në krye të kësaj kompanie.

Kush është Cristophe François Darbord?

Ish-administratori i ARMO-s nga viti 2013-2015, është aksioneri kryesor i kompanisë Tosk Energji, një kompani e krijuar në qershor të vitit 2015, (kohë që përkon me largimin e tij nga drejtimi i ARMO), me aktivitet në fushën e tregtimit me shumicë të karburanteve.

Në 2016-n, ajo u rendit mes 200 kompanive më të mëdha në vend dhe ka deklaruar të ardhura prej 2.2 miliardë lekësh në 2016-n, sipas të dhënave zyrtare të bilancit.

“Mësohet se ky subjekt tregton naftën e përpunuar nga ARMO. Në qershor të vitit 2016, Tosk Energji e bleu CFD Conseils Sarl, një shoqëri e së drejtës zvicerane, e përfaqësuar nga z. Christophe Darbord,” –shkruan Monitor

Burime për Faxweb.al bëjnë me dije se ish-administratori është rishfaqur dhe ka marrë me qira  rafinerinë e përpunimit të naftës në Ballsh.

Ky nuk është vetëm një rikthim…

Ish-administratori Cristophe François Darbord ka ende të pambyllur çështjen lidhur me përgjegjësinë e tij si administrator për 2 vitet që drejtoi ARMO-n, duke hapur një gropë prej 174 milionë dollarësh në buxhetin e shtetit shqiptar.

Përfshirja e ish-administratorit në sektorin e hidrokarbureve, paralajmëron një skemë të fortë mashtrimi në dëm të interesit shtetëror dhe publik.

Mbetet i paqartë roli i qeverisë shqiptare dhe se cili do jetë hapi i radhës nga ministria lidhur me futjen e një personazhi si Darbord në sektorin e hidrokarbureve, kur mbi “shpinën” e këtij të fundit rëndojnë miliona dollarë borxhe.

Do kemi vazhdimin e të njëjtit skenar apo loja do të ndryshojë?

Kjo mbetet për t’u parë…

Faxweb.al