Ish-kryeministri i vendit Fatos Nano ka dhënë një intervistë me rastin e 20-vjetorit të emisionit ‘’Opinion”. Edhe pse ka 12-vite që është larguar nga skena aktive politike, duket se koha ka mbetur në vend për ish-liderin socialist.
“Është e vështirë të jesh i pari pasi të kap plumbi, po as edhe në fund nuk duhet të rrish se të marrin rob. Debati me Berishën meriton vlerësim, ishte hera e parë që drejtues të kampeve kundërshtarë kishin një takim mes tyre. Ndoshta nuk gabohem të them që intervista më e vështirë ka qenë ajo e 2001-it”, u shpreh Nano kur u pyet nga Fevziu në lidhje me të qënit një nga liderët e parë që pranonte intervistë ‘’live” në televizion.
Po ashtu ai cilësoi një nga intervistat më të vështira të tij atë të 2001 kur ‘’Live” në emision ai tregonte për ndarjen nga ish-bashkëshortja e tij Rexhina.
“Nuk më mbetet veçse të përsëris ato që kam thënë atëherë, mora një vendim që erdhi për shkak të konsumimit të martesës së parë. Për fat të mirë më në fund pavarësisht nga ajo zgjidhje me sëpatë e kemi menaxhuar me kujdes dhe sot kemi një gjendje mes dy familjeve që marrin frymë lirisht”, vijoi më tej ish-kryeministri.
Fevziu: Je penduar që je martuar sërish?
Nano: Jo se do thoja se skisha çfarë të bëja tjetër.
Fevziu: A e shihni më politikën si pasion?
Nano: Me keqëardhje jam i detyruar të pranoj se pasioni i të bërit politikë është pak larg.
Fevziu: Keni fituar apo keni humbur gjatë angazhimit tuaj në politikë?
Nano: Kam fituar dhe kam humbur, sigurisht që kam fituar miq dhe formim.
Fevziu: Njerëzit që ke ndihmuar të braktisin pasi nuk ke më pushtet?
Nano: Është një gjendje ciklike, shfaqja e parë e ndryshimit të raporteve është mungesa e mirënjohjes. Duhet të jesh i përgatitur mirë që ta përballosh emocionalisht.
Fevziu: A ju mungon pushteti?
Nano: Nëqoftëse pushtetin do ta quajmë fuqinë për të vendosur mbi fatet e të tjerëve jo, nuk më mungon. Por nëse pranojmë që pushtet do të thotë edhe emri i mirë, edhe vazhdim shfaqjes admirimi nga njerëz shumë të rinj dhe që natyrshëm po kërkojnë një foto, sot kam mësuar selfie-t në këtë moshë prej tyre (qesh), sepse duan një foto, një provë, që dëshmitë familjarë kanë qenë të vërteta.
(E.K/SHUPLAKA)
