Është rikthyer qetësia në kampin kuqezi sa i përket pjesës së sulmit, ku viroza e Armando Sadikut e rrezikonte repartin për shkak të alternativave të pakta.
Në konferencën për shtyp të ditës së enjte, sulmuesi i Legias së Varshavës ka deklaruar se do të jetë i gatshëm për trajnerin: “Kam patur një virozë, por tani jam mirë dhe do të rikthehem në stërvitje. Më pas, do të jetë trajneri ai që do të vendosë për formacionin”.
Edhe pse ndeshja e parë do të jetë ajo ndaj Lihtenshtejnit ditën e shtunë, interesi dhe vëmendja mbetet tek ndeshja e dytë me Maqedoninë, por Elseid Hysaj vendos theksin tek ndeshja e parë, përpara se të mendojnë për takimin në Strumicë.
“Me të vërtetë që në letër duket një kundërshtar i lehtë Lihtenshtjeni, por në futbollin e sotëm asgjë nuk dihet. Duhet t’i marrim ndeshjet me radhë, të përqendrohemi tek ndeshja e parë dhe më pas të shohim për Maqedoninë”, deklaroi Hysaj.
Mbrojtësi i Napolit ka patur edhe një mesazh për të gjithë tifozët kuqezi, të cilët në një mesazh publik një ditë më parë theksuan braktisjen e skuadrës përfaqësuese për ndeshjet brenda.
“Ata duhet të jenë të pranishëm për të na mbështetur. Ne jemi këtu për të luajtur për kombëtaren, që nuk zhvillon ndeshje çdo javë si kampionatet. Besoj dhe shpresoj të vijnë të na mbështesin si kanë bërë gjithmonë”, u shpreh Hysaj.
