Këshilli i Ministrave të Bashkimit Europian ka arritur me Parlamentin Europian marrëveshjen për aktivizimin e shpejtë të mekanizmit të pezullimit të përkohshëm të lëvizjes së lirë, për vendet e treta që abuzojnë me liberalizimin e vizave.
Ky mekanizëm do të aktivizohet së pari në rastet kur ka rritje të konsiderueshme të numrit të shtetasve të një vendi të tretë si për shembull, Shqipëria, të cilëve u është refuzuar hyrja apo që kanë qëndruar në mënyrë të parregullt në territorin e BE-së, raporton TV Klan
Sipas ligjeve të Bashkimit Europian, mekanizmi aktivizohet kur ka rritje të konsiderueshme të kërkesave të pabaza për azil dhe së treti, mungesë të bashkëpunimit në marrëveshjet e ripranimit që kanë të bëjnë me kthimin e emigrantëve.
Është Komisioni Europian ai që monitoron situatën e vendeve që përfitojnë nga liberalizimi i vizave dhe që i raporton Parlamentit Europian dhe Këshillit nëse duhet rikthyer regjimi i vizave apo jo.
Marrëveshja për këtë çështje pritet të miratohet në seancën plenare të Parlamenti Europian, e cila zhvillohet javën e ardhshme dhe më pas duhet të votohet edhe nga parlamentet e vendeve anëtare për të hyrë më pas në fuqi.
Discussion about this post