Partizani për këtë sezon pritet që të jetë më i kompletuar pasi të kuqtë presin rikuperimin e plotë të mesfushorit kosovar Mentor Mazrekaj. 27-vjeçari po bën gati një vit që nuk është në dispozicion të skuadrës dhe mungesa e tij ka qenë një minus i madh për kryeqytetasit. Kjo për shkak të një operacioni që kreu në marsin e vitit të shkuar në kaviljen e këmbës së djathtë.
Por së fundmi është kthyer optimizmi në kampin e kuq për Mazrekajn i cili e ka kaluar plotësisht komplikacionin që i solli operacioni duke u shëruar plotësisht. Prej javësh Mazrekaj ka nisur përgatitjet intensive për të kapur formën optimale, në mënyrë që të jetë 100% i gatshëm për trajnerin Sulejman Starova.
Në ndeshjen e fundit me Skënderbeun stafi teknik e aktivizoi 27-vjeçarin në minutat e fundit duke treguar se Mazrekaj e ka kaluar lëndimin dhe sfida e vetme mbetet kapja e formës fizike. Faza përgatitore në Antalia pritet që t’i vlejë shumë Mentor Mazrekajt dhe jao që pritet është që mesfushori të jetë i gatshëm për trajnerin Starova që në ndeshjen e parë me Luftëtarin. Po kështu Mentor Mazrekaj nuk ka shfaqur asnjë problem gjatë seancave të para që janë zhvilluar në Antalia dhe ngarkesën po e suporton pa asnjë problem.
Ndryshimi i skemës me rikthimin e Mazrekajt në formacionin bazë pritet që të ndryshojë edhe vendosja e gjithë lojtarëve në fushën e lojës. Zakonisht në të majtë të mesfushës trajneri Starova ka përdorur disa alternativa si Trashi, Torasa, Bardhi e Fili. Por Partizani nuk i mban sytë vetëm nga Mazrekaj, por edhe nga përforcimet e mëtejshme të janarit, ku ditë më parë është folur edhe për sulmuesin shqiptar të Kombëtares së Maqedonisë, Agim Ibrahimi apo rikuperimi i plotë i Xhevahir Sukajt.
Duke parë situatën aktuale në kampin e kuq, pritet që Partizani i pjesës së dytë të sezonit të ketë një karakter më sulmues dhe nëse do të rikthehet Mazrekaj i dikurshëm, sulmuesit e deklaruar do të kenë më shumë topa në dispozicion. Me rikthimin e 27-vjeçarit, trajneri Starova do të ketë më shumë alternativa në dispozicion, por vështirësia qëndron në përzgjedhje, shkruan një portal online. (J.V/Shuplaka)
