Rinas/ Tentoi të kalojë kufirin me të dhëna të falsifikuara, bie në pranga 42-vjeçari (Emri)

Policia Kufitare Rinas, ditën e sotme ka zbuluar identitetin e vërtetë të një shtetasi, i cili ishte shpallur në kërkim në Itali.

Raportohet se shtetasi i ndaluar është, Muhamed (Bledar) Leka, 42 vjeç, banues në Lushnje, i cili ka tentuar të kalojë kufirin me të dhëna të falsifikuara.

Nga ana tjetër nga burimet e policisë bëhet me dije se 42-vjeçari ishte i dënuar me 12 vjet e 2 muaj burg dhe i shpallur në kërkim për “Vrasje me dashje e kryer në bashkëpunim”.

Njoftimi i policisë:

“Intervistimi profesional i Policisë Kufitare Rinas, zbulon identitetin e vërtetë të një shtetasi në kërkim në Itali, i cili tenton të kalojë kufirin me Leje Kalimi me të dhëna të fallsifikuara

Shtetasi i ndaluar , i shpallur në kërkim për “Vrasje me dashje e kryer në bashkëpunim” i dënuar me 12 vjet e 2 muaj burg.

Në vijim të kontrolleve për evidentimin dhe kapjen e personave të shpallur në kërkim dhe goditjes së paligjshmërisë, Policia Kufitare Rinas ndaloi shtetasin:

Muhamed (Bledar) Leka, 42 vjeç, banues në Lushnje.

Ndalimi i këtij shtetasi u bë pasi, Gjykata e Rrethit Gjyqësor Lushnje me vendimin e datës 18.11.2003, ka bërë njohjen e vendimit Penal të Gjykatës së Krimeve të Rënda Verona në Itali, e cila e ka dënuar me 12 vjet e 2 muaj burgim për veprën penale “Vrasje me dashje e kryer në bashkëpunim”, parashikuar nga Nenet 76 – 25 të Kodit Penal.

Shtetasi Muhamed Leka, erdhi si pasagjer nga jashtë shtetit me Leje Kalimi me emër tjetër, por punonjësit e Policisë Kufitare , gjatë përpunimit të dokumentacionit kanë shfaqur dyshime , dhe pas një intervistimi profesional të kryer nga Specialistët për hetimin e Krimit në Komisariatin e Policisë Kufitare Rinas, rezultoi se ishte person në kërkim për veprën penale “Vrasje e kryer në bashkëpunim”.

Shtetasi i mësipërm, ju dorëzua Komisariatit të Policisë Lushnje për veprime të mëtejshme.”

(E.V/Faxweb.al)