Rinis sezoni i dytë i ‘telenovelës’ Shullazi, shtyhet seanca për herë të 7-të

Gjykata e Apelit për Krime të Rënda, u detyrua të shtyjë për të shtatën herë seancën ndaj Emiljano Shullazit dhe 4 të pandehurve të tjerë.

Edhe këtë herë shkak është bërë mbrojtja, kështu avokati Emiljano Shullazit, Vladimir Meçe, duke paraqitur një raport, njoftoi mungesën e tij për shkaqe shëndetësore.

Ndërkohë, avokati i caktuar nga gjykata për Gilmando Danin, njoftoi se nuk mund të ishte mbrojtës i tij, pasi më Shkallë të Parë ka mbrojtur Ylvi Beqjen. Në këto kushte, gjykata shtyu seancën dhe bëri zëvendësimin e avokatit kryesisht.

Shqyrtimi i dosjes për Shullazin ka nisur në Apel në muajin janar të 2019, por deri më tani nuk është zhvilluar asnjë seancë për shkak se avokatët mbrojtës nuk janë paraqitur në gjykatë.

Kujtojmë se e njëjta zvarritje për proceset e Shullazit u ndoq dhe në Gjykatën e Krimeve të Rënda, derisa u arrit në vendimin për ta dënuar me 14 vite burg.

Për katër anëtarët e tjerë të grupit, Gjykata ka dhënë 12 vite burg për Gilmando Danin, Indrit Qyqja 10 vite, Indrit Zela 10 vite dhe Blerim Shullazi 9 vite burg. Në vendimin e Gjykatës theksohet se askush nga të dënuarit nuk do të përfitojë liri me kusht.

Dënimet e dhëna nga Gjykata për grupin “Shullazi”:

Emiljano Shullazi – 14 vite burg

Gilmando Dani – 12 vite burg 

Endrit Qyja – 10 vite burg

Endri Zela – 10 vite burg 

Blerim Shullazi – 9 vite burg

(E.K/FAXWEB.AL)