Kanë rinisur kërkimet në minierën e Bulqizës, pas shpërthimit të regjistruar një ditë më parë. Mësohet se grupet e shpëtimit kanë arritur në nivelin e 14-të të galerisë, ndërkohë që duhen edhe 1000 metra që ekipet e shpëtimit të arrijnë në nivelin 21.
3 minatorë kanë mbetur të bllokuar në galerinë e minierës së kromit. Raportohet se shanset që tre minatorët kinezë të jenë ende gjallë janë të pakta. Ata mbetën të bllokuar pas shpërthimit të gazit të hidrogjenit në minierë.
Një ditë më parë u raportua se tre minatorët që kishin mbetur të plagosur, u dërguan menjëherë në spitalin e Bulqizës, ku ndodhen jashtë rrezikut për jetën. Pas lajmit të shpërthimit, grupe të gatshme të avarive në ambientet e minierës ndërhynë menjëherë.
Nga Tirana u nisën zv.ministri Gëzim Musabelliu, grupet e Repartit të Inspektim-Shpëtim Minierave, drejtues të strukturave të mbikëqyrjes së minierave në Ministrinë e Energjisë dhe Agjencinë Kombëtare të Burimeve Natyrore. (XH.A/SHUPLAKA)
