Është mëse e qartë se në 25 Qershor Shqipëria nuk mundi të realizonte zgjedhje të pakontestuara dhe të shkëputura nga fenomeni i shëmtuar i manipulimit të votave. Vetëm nga 21 kutitë që janë rinumëruar në KQZ sa i përket qarkut të Tiranës PDIU ka marrë 16 vota më shumë.
Pothuajse asnjë nga kutitë e numëruara nuk ka nxjerrë një rezultat të njëjtë me procesverbalet e miratura më herët, çka fakton haptazi parregullsitë.
Po ç’rezulton nga ky numërim? Ku kanë shkuar votat e PDIU-së? Nga 16 votat që janë shtuar për PDIU-në, 10 prej tyre i janë quajtur PSD-së, parti kjo që as nuk ishte në një vend të afërt me PDIU-në në fletën e votimit. (PSD-ja e 9-ta, PDIU e 13-ta).
PSD e Skënder Gjinushit mori një mandat në Kuvendin e ardhshëm me Tom Doshin në Shkodër.
Nga ana tjetër 6 prej votave të Partisë së Shpëtim Idrizit në numërimin që i ishte bërë në 25 Qershor ishin konsideruar të pavlefshme. Një kleçkë kjo e përdorur jo pak, dhe e denoncuar publikisht dje nga vetë Idrizi.
Sa kohë që këto manovra përdoreshin në kryeqytet ku dhe vëmendja e vëzhguesve të të gjitha partive ka qenë mjaft e lartë, pikëpyetje të mëdha ngrihen se ç’grabitje janë bërë në qytetet e tjera.
Edhe më herët PDIU ka sqaruar se të gjitha kutitë që ajo ka kontestuar janë në ato grupe numërimi ku kjo parti nuk kishte numërues të saj.
Ndërkohë që me shumë gjasa të njëjtin fat kanë pasur dhe Parti të tjera si LIBRA, sakaq kujtojmë që edhe Blushi nuk ka ngelur pa bërë kallëzimin e tij.
(E.K/SHUPLAKA)
