KAS do të mblidhet sot në orën 11:00 për të vendosur nëse do të quhen apo të vlefshme rezultatet e zgjedhjeve në katër qarqet e mbetura Elbasan, Tiranë, Fier dhe Durrës. Për tre javë rresht, administrata e KQZ rinumëroi disa kuti të Elbasanit dhe Durrësit si dhe u kontrolluan plotësisht votat e dy qarqeve më të mëdhenj, Tiranë dhe Fier.
Të premten u mbyll rinumërimi i kutive të Durrësit, 85 prej të cilave ishin të diasporës, ku nuk u prodhua asnjë ndryshim në rezultat. Nga hapja e kutive të këtyre qarqeve, PD ishte partia që humbi më shumë vota, por me ndikim të papërfillshëm. Më shumë diferenca u gjetën tek votat për kandidatët, të cilat në Tiranë ishin më shumë gabime njerëzore, ndërsa në Fier pati raste që dyshohen seriozisht për abuzime.
Në Fier rinumërimi i dha mandat me 10 vota diferencë Maldrita Bardhos, por kjo e fundit e refuzoi, duke ia lënë karrigen Zegjine Caushit, e cila kishte fituar në raundin e parë të numërimit.
KQZ ka certifikuar përfundimisht rezultatet për 8 qarqet e tjera, ndërsa janë shpërndarë edhe mandatet. Vendimi u mor pasi Kolegji Zgjedhor rrëzoi ankimimet e PD-së për këto qarqe, duke ezauruar të gjitha hallkat ankimuese për rezultatin.
