Sekretari i Përgjithshëm i Partisë Demokratike, Arben Ristani, ka mohuar mundësinë e një koalicioni të PD-së me Lëvizjen Socialiste për Integrim, duke theksuar se bashkëpunimi me këtë forcë partiake do të ishte vetëm për garantimin e zgjedhjeve të lira dhe implementimin e votimit elektronik.
Ai u shpreh në një intervistë për “Ora News” se Partia Demokratike është e hapur për koalicione me me të gjithë spektrin opozitar, por jo me partitë në pushtet, duke i fajësuar ato për qeverisjen e vendit, që e kanë katandisur Shqipërinë në këtë gjendje.
“Ne jemi të hapur për të krijuar bashkëpunim me çdo forcë politike e cila pranon si zgjidhje në këto momente identifikimin biometrik dhe votimin elektronik, qofshin parti edhe brenda mazhorancës.”, u shpreh ai.
Sa i përket procesit zgjedhor dhe implementimit të elektronikës në zgjedhjet e 18 qershorit, duke qenë se ka mbajtur detyrën e kryetarit të KQZ-së, ai ka këtë përgjigje për OSBE-në:
“Në rast se ata do të ishin realisht të interesuar që në Shqipëri të kishim një kod që të përfshinte të gjithë rekomandimet e OSBE-ODIHR do ta kishin bërë detyrën mirë në rast se do të ishin interesuar për këtë para zgjedhjeve të 2015. Në momentin kur çështja është ndezur tashmë nuk mund të dalësh dhe të thuash që nuk ka kohë. Ku ishe për ta bërë presionin sipas detyrës tënde, sepse secili ka detyrën e vet.”
(XH.A/SHUPLAKA)
Discussion about this post