Dy muaj nga protesta kundër vendosjes së tarifës së Rrugës së Kombit në Kukës, qeveria paralajmëron rivendosjen e saj.
Duket se qeveria ka zgjedhur pikërisht sezonin e verës për të rinisur projektin e saj, pasi rezistenca e qytetarëve mund të jetë më e vogël.
Aktivisti Besjan Peshaj, i ftuar në ‘’Fax news’’ tha se qeveria po sillet si skuth, duke mos pyetur ende qytetarët se çfarë mendojnë për këtë tarifë.
Ai tha më tej se ende sot kryeministri Rama dhe pse ka shkuar në të gjitha qytetet e vendit, nuk ka shkuar në qytetin e Kukësit.
‘’Nga qeveria nuk pati asnjë lloj tërheqjeje, asnjë lloj reflektimi. Ka pasur shkelje flagrante të ligjit nga ana e Policisë.
Qeveria veproi si skuth, si skutha i vendosën në fillim pikat e pagesës, po njësoj po sillen edhe tani. Kryeministri që ka shkuar në të gjithë vendin nuk ka shkuar ende në Kukës që të ballafaqohet me qytetarët.
I gjithë debati është zhvilluar në formën e spekulimeve, se mbi çfarë negociatash është vendosur kjo lloj takse, ende nuk dihet.
Për mua pagesa do të nisë në Korrik, Gusht, pasi atëherë rezistenca e qytetarëve është shumë më e vogël, për shkak të pushimeve. Vendimet më të këqija janë marrë në verë edhe më herët nga kjo qeveri.
Një qeverisje që pretendon që është e majtë ul taksat për qytetarët dhe nuk i rrit ato. Qytetarët shqiptarë kanë kursyer disa para dhe kanë blerë një makinë të vjetër, ti i ke taksuar njëherë ata me naftën, kjo që ndodh është zhvatje.
Kjo taksë është antikushtetuese, fatkeqësisht ne nuk kemi një Gjykatë Kushtetuese, pasi nëse do të ishte besoj, që do ta rrëzonte këtë vendim”, u shpreh Peshaj.
(E.K/FAXWEB.AL)
Discussion about this post