Roli i Berishës në zgjedhjet për kreun e PD-së? Selami: Ai e ka shprehur publikisht që mbështet Bashën dhe e kuptoj

Eduart Selami është kandidati i vetëm përballë Bashës për kryetar të Partisë Demokratike në zgjedhjet e 22 Korrikut.

I ftuar në “7 pa 5” ai ka komentuar garën që ka përballë Lulzim Bashës por edhe të pakënaqurit e tjerë në PD, duke theksuar se dhe midis tyre ka përçarje.

Po ashtu duke komentuar rolin e Sali Berishës, ai tha se lideri historik i demokratëve e ka shprehur hapur mbështetjen ndaj Bashës.

“Kjo nuk do të jetë një votë kundër Bashës si individ, kjo është një votë kundër modelit. Ajde ta kthejmë PD në një nga modelet më të mira që një parti ka në vend.

Ka vend për të gjithë në Parti. Sali Berisha e ka shprehur publikisht mbështetjen ndaj Bashës dhe i jap të drejtë pasi ai ka investuar te Basha”, u shpreh ndër të tjera Selami.

Kujtojmë se pak ditë pas rezultatit zhgënjyes në zgjedhje Sali berisha në një reagim në rrjetet sociale u shpreh se në Partinë Demokratike ka vend për të gjithë, duke justifikuar në njëfarë mënyre rikandidimin e Bashës.

Nga ana tjetër theksojmë se në mbledhjen e djeshme të Kryesisë së PD-së pati debate të shumta nga të pranishmit. Edhe pse u kërkua shtyrja e zgjedhjeve u sqarua se kjo nuk është kompetencë e kryesisë pasi sqarohet në statut.

Po ashtu ligjërisht Astrit Patozi mbeti jashtë gare pasi disa nga kushtet e vendosura nga ai për të qenë pjesë e kandidimit nuk u pranua. (E.K/SHUPLAKA)