Rrahja e Ismet Drishtit, reagon AMA: Hetim për kapjen e autorëve

Pas dhunës së ushtruar ndaj gazetarit dhe drejtuesit të Televizonit “Zjarr TV” Ismet Drishti ka reaguar Autoriteti i Mediave Audiovizive.

Gjatë një deklarate për mediat AMA u kërkon autoriteteve përkatëse që të kryhet një hetim i thelluar për gjetjen e autorëve të ushtrimit të dhunës, që ka sjellë dëmtimin fizik të Z. Drishti, por dhe që përbën alarm për lirinë e medias në Shqipëri.

Autoriteti i Mediave Audiovizive apelon fuqishëm ndaj autoriteteve përgjegjëse të sigurisë në vend që të bëjnë të gjitha përpjekjet që ata që kanë ushtruar dhunë ndaj gazetarit Ismet Drishti të përballen me ligjin, si një garanci për lirinë e medias dhe për të gjithë gazetarët.

Ky është sulmi i dytë që kryhet ndaj “Zjarr TV” dhe drejtuesit të saj. Pak ditë më parë u dhunuan ambientet e këtij televizioni dhe u dëmtuan e u vodhën pajisje të shumta nga persona ende të paidentifikuar nga policia.

(S.M/Faxweb.al)