Lajmi për dhunimin e një mbështetësi të LSI-së në Zharrëz, është bërë fillimisht i ditur nga kreu i kësaj force politike, Petrit Vasili.
Më vonë u publikuan foto të maturantit të dhunuar Orgest Grembi, më pas doli edhe një video ndërsa në fund fare Ilir Meta shkoi ta vizitonte në spitalin rajonal të Fierit. Mirëpo deri më tani nuk kishim ende një deklaratë zyrtare nga Policia.
Vetëm në orët e vona të mbrëmjes së sotme, kemi një reagim zyrtar nga Policia, e cila sqaron se ka proceduar penalisht të dy kushërinjtë e konfliktuar, edhe i riu i cili deri më tani thuhet se është dhunuar nga eksponentë të PS-së, për shkak se kishte deklaruar se mbështeste LSI-në.
NJOFTIMI I PLOTË
Nën drejtimin e Prokurorisë së Fierit, Specialistët për Hetimin e Krimeve në Komisariatin e Policisë Fier proceduan penalisht në gjendje të lirë shtetasit:
A.G, 57 vjeç, banues në Belinë, Patos.
Procedimi penal ndaj këtij shtetasi u bë pasi në datën 14.06.2017 në orën 14:00 u paraqit në Stacionin e Policisë Patos shtetasi O.G, i cili ka kallëzuar se në datën 14.06.2017 rreth orës 13:00 pas një konflikti për motive të dobëta është dëmtuar në trup si dhe i është thyer telefoni i tij nga shtetasi A.G.
O.G, 18 vjeç, banues në Belinë, Patos.
Procedimin penal ndaj këtij shtetasi filloi pasi sot në datën 14.06.2017, në orën 16:00, u paraqit shtetasi A.G, 57 vjeç, banues në Belinë, Patos, i cili ka kallëzuar se në datën 14.06.2017 rreth ores 12:00 pas një konflikti për motive të dobëta është dëmtuar në fytyrë me grushta nga shtetasi O.G
Policia ka dhënë vendimin për kryerjen e ekspertimit mjeko ligjor për shtetasit A.G dhe O.G.
U krye këqyrja e personave ku u vërejt se shtetasit A.G dhe O.G kishin dëmtime të lehta.
Materialet proceduriale i kaluan Prokurorisë pranë Gjykatës së Shkallës së Parë Fier për hetime të mëtejshme për veprat penale “Dëmtime të tjera me dashje” dhe “Shkatërrim prone” parashikuar nga Nenet 90 dhe 150 të Kodit Penal në ngarkim të shtetasit A.G.
Për veprën penale “Dëmtime të tjera me dashje” parashikuar nga Neni 90 i Kodit Penal në ngarkim të shtetasit O.G. (D.D/Shuplaka)
