Është arrestuar nga policia autori që mori pjesë në konfliktin e ashpër në protestën e opozitës, ku u plagosën babë e birë, Ymer dhe Erjon Çela.
Ai quhet Zamir Sijani, banues në fshatin Xhafzotaj Durrës, (i dënuar më parë për veprat penale “Trafikimi i lëndëve narkotike” dhe “Mbajtja pa leje dhe prodhimi i armëve, armëve shpërthyese dhe i municionit”).
Informacion paraprak:
Kapet dhe ndalohet një prej autorëve të “Plagosjes së rëndë me dashje”, të dy shtetasve mbrëmjen e datës 2 Qershor në bulevardin “Dëshmorët e Kombit”
Në vijim të kqyrjes së pamjeve filmike, si dhe informacioneve të marra në rrugë operative u bë kapja dhe ndalimi me inisiativë i shtetasit :
- S, 43 vjeç, banues në fshatin Xhafzotaj Durrës, (i dënuar më parë për veprat penale “Trafikimi i lëndëve narkotike” dhe “Mbajtja pa leje dhe prodhimi i armëve, armëve shpërthyese dhe i municionit”).
Ndalimi i tij u bë pasi më datë 02.06.2019, rreth orës 20:00, në Bulevardin “Dëshmorët e Kombit“ dhe në rrugën “George Ë Bush”, ka prishur qetësinë publike në kohën që subjekti politik Partia Demokratike dhe aleatët zhvillonin protestën dhe ka goditur me mjete të forta shtetasit, Y. Ç dhe E. Ç (babë e bir) banues në Tiranë, duke ju shkaktuar dëmtime të rënda në pjesën e kokës.
Materialet i kaluan Prokurorisë për veprime të mëtejshme për veprat penale “Plagosje e rëndë me dashje” dhe “Prishja e qetësisë publike”.
Lidhur me sherrin që ndodhi gjatë zhvendosjes së protestuesve nga Bulevardi “Dëshmorët e Kombit” tek Kuvendi mbrëmjen e 2 Qershorit, në afërsi të Piramidës, kanë dalë edhe pamjet nga moment kur ka ndodhur sherri për të cilin babë e bir pretendojnë se dhuna ka ardhur nga efektivë civilë të policisë.
Në një intervistë për Fax News protestuesi që mbeti i lënduar në protestën e opozitës, Ymer Çelaj, ish-badigardi i Sali Berishës tregon se ai rrjedh nga një familje e persekutuar, ndërsa ata që e kanë sulmuar nga pas kanë qenë punonjës civil të policisë.
Ymer Çelaj së bashku me djalin e tij mbetën të lënduar pas një sherri masiv në afërsi të piramidës, ndërsa më pas u transportuan drejt spitalit.
“Jemi nisur nga shtëpia në mënyrën më qytetare, nuk qëndrojmë përpara policisë, rrimë anash, aty ku rrijnë dhe punonjësit e mediave.
Unë rrjedh nga një familje e persekutume, kam një biznes timin privat, hamë bukën tonë. Kemi marrë kërcënime nga njerëz të panjohur, kishin pistoleta. Dëmtimi ka nisur pas fjalës së Bashës, kur iu drejtuam Kuvendit. Provokimet na erdhën nga njerëz të panjohur. Diktova që kishin pistoleta.
Njëri ka ardh nga pas dhe më ka gjuajtur nga mbrapa me pistoletë, dhe më ka thirru Ymer Çelaj. Civilët nuk mbajnë pistoletë në protestë, mendoj se kanë qenë punonjës policie. Në ambulancë kam derdhur 1 kile gjak”,shprehet Ymer Çelaj në prononcimin e tij për gazetaren e Fax News Eksiola Shehu.
”I mori një qytetari flamurin e LSI-së, dhe kërkoi që të më nxirrte sytë me flamurin. Më pas u përleshëm me tifozët e LSI-së. Ne ishim si qytetarë, nuk ka fyer asnjë punonjës policie, nuk i jap dot dum kësaj”, tha më tej Çelaj.
(F.GJ/FAXWEB.AL)
