Moderatorja Jonida Shehu ka qënë e ftuar dje në emisionin“E diell”, ku u pyet nga Adi Krasta, për “median e kazanit”, ashtu siç kryeministri i ka cilësuar ato shpesh herë.
Lidhur me këtë pyetje Shehu pohoi se në fakt ekzistojnë media që prodhojnë lajme të pavërteta.
“E mbaj mend, ka qenë kolegia Anila Basha ajo që i ka thënë: “Zoti Kryeministër, ke deklaruar se jemi media kazani dhe e ke pasur fjalën për portale…”. Gjeti një justifikim kryeministri aty për aty dhe tha që “kujt t’i djegë le ta mbajë”. Unë e kam pasur fjalën për ato media që nuk verifikojnë lajme përpara se t’i japin, por krijojnë tymnajë dhe po themi lajme më shumë për “like””, ka thënë Shehu, duke treguar për darkën që bashkëshortja e kryeministrit, Linda Rama organizoi për gazetaret në fund të vitit.
E pyetur nga Adi Krasta nëse ky lajm i ka djegur, ajo tha: “Jo, nëse do më digjte nuk do kisha shkuar në atë darkë ndoshta, ose nuk do isha ndier rehat. Por nuk më dogji, se nuk e ndiej veten pjesë të një media apo të një programi, apo të një lloj kontributi në gazetari për aq sa unë kam që spekulon, ne nuk spekulojmë. Ka shumë që spekulojnë dhe mbasembase nëse do ta analizonim mirë deklaratën e kryeministrit, absolutisht nuk është përgjithësuese, por nuk është se nuk ka media që janë të diskutueshme, sidomos në epokën dixhitale dhe me Facebookun vërdallë”, tha ajo. (J.V/Shuplaka)
