Detaje të reja janë zbardhur nga intervista që vëllai i Dritëro Agollit, Tajari, ka dhënë rreth një muaj pas vdekjes së shkrimtarit në moshën 85-vjeçare. Në intervistën për një gazetë të përditshme, ai ka rrëfyer për marrëdhënien e Dritëro Agollit me bashkëshorten Sadijen dhe raportin e të vëllait me ish-kryeministrin Berisha.
Pasi ka folur për historinë e parë të dashurisë së Dritëroit me vajzën ruse, me të cilën pati edhe një djalë, i vëllai është ndaluar në kujtimet e të shkuarës, vlerësimin e tij për Sadijen dhe se çfarë i tha babai Dritëroit kur u martua me vajzën shkodrane.
Për njohjen me Sadijen, Tajari rrëfen se Dritëroi me Ismail Kadarenë i jepnin mësim grupit të gazetarisë ku bënin pjesë Elena dhe Sadija. Sipas tij, Elena u bë sebep që ata të bashkoheshin.
“Sadija ishte shumë e mirë, i ka ndenjur Dritëroit mbi kokë gjithë jetën, si në krijimtari, ashtu edhe në jetën bashkëshortore. Dritëroi bëri zgjedhjen e duhur me Sadijen. Në muajt e parë të martesës, babai nuk e kuptonte mirë shkodrançen e Sadijes dhe i thotë Dritëroit: “Ah mor djalë, nuk hoqe dorë nga të huajat, të huaj e kishe të parën, të huaj edhe të dytën, nuk e kuptojmë fare gjuhën.”, rrëfen Tajari, teksa shpreh vlerësimin për të kunatën.
Duke u ndalur në raportin e të vëllait me Sali Berishën, Tajari ka rrëfyer se Dritëro Agolli i ka treguar se së bashku me Enver Hoxhën ka qenë në shtëpinë e Berishës ku ishte takuar me babanë e tij. Kur e kishte pyetur se si i shkonte jeta, babai i ish-kryeministrit i kishte rrëfyer se djalin donte ta çonte në shkollë të lartë pasi ishte nxënës shumë i mirë.
“Gjatë periudhës që Dritëroi ka qenë në parlament, Saliu nuk e ka sulmuar ashpër. Ajo që më bëri përshtypje ishte mungesa e Sali Berishës në homazhet për Dritëroin sepse ata kanë pasur një lloj miqësie. Vetë Saliu në 1992, pas fitores së zgjedhjeve të para demokratike, e ftoi Dritëroin që të bëhej pjesë e Partisë Demokratike. Saliu i tha që ti je shembull për demokracinë. Dritëroi u ngrit dhe tha se unë jam mirë aty ku jam sepse kritikoj edhe majtas, edhe djathtas. Po të jem këtu dhe të kritikoj të djathtën, juve do t’u mbetet hatri dhe do të më kujtoni: Je anëtari i Komitetit Qendror të PPSH¬së, ndërsa atje s’ma thonë këtë gjë.”, tregon i vëllai i shkrimtarit që shprehet se i ka bërë përshtypje mungesa e Berishës në homazhet për Dritëroin.
(XH.A/SHUPLAKA)
