Nga e hëna e ardhshme, qeveria u jep dritën jeshile berberëve e parukierëve, e bashkë me to edhe klinikave dentare e qendrave tregtare për të rinisur aktivitetin e tyre. Ndërkohë që një javë më vonë, më 18 maj, do të hapen baret dhe restorantet por duke respektuar disa rregulla strikte.
Për të gjitha këto shërbime, ekspertët e qeverisë kanë bërë gati paketën e kushteve të rrepta të sigurisë që duhet të respektojnë bizneset për të vepruar. Në dijeni të tyre duhet të jenë dhe klientët, të cilët duhet të informohen paraprakisht për masat që duhet të marrin apo shërbimin që duhet të kërkojnë, bazuar protokollit bashkëngjitur shkrimit.
Që nga hyrja me qese plastike për këpucë e maskë në fytyrë e deri te vendi ku ulet personi që kërkon shërbim për flokët do të jetë tërësisht e mbuluar me materiale njëpërdorimshme, që sigurohen nga berberi/floktorja.
Edhe pse kanë më shumë se dy muaj pa punuar (ligjërisht), berberët e parkukeritë duhet të furnizohen paraprakisht me mjete higjienizuese, përpara se të nisin punën më 11 maj. Për të shmangur radhët e pritjes, duhet prenotuar më parë te berberi. Ky i fundit duhet të riorganizojë ambientin e punës, duke siguruar distancën 2 metra mes klientëve.
Për shembull, në një ambient prej 40 metrash katrorë, nuk mund të qëndrojnë më shumë se katër persona (10 m për çdo klient). Mbajtja e maskës dhe higjienizuesi në hyrjedalje është e padiskutueshme në çdo moment, si nga berberi, ashtu edhe nga klientët. Në rastin e trajtimit të fytyrës, këshillohet sigurimi i distancës më të madhe të mundshme.
Peshqirët, gjithashtu këshillohet të jenë të paketuar dhe njëpërdorimësh. Klienti, nga ana e tij duhet të sigurohet që berberi ta ketë dezinfektuar mjetet e punës përpara shërbimit. Kusht për të funksionuar është dezinfektimi i ambientit, minimalisht 3 herë në ditë me mjetet e duhura.
Discussion about this post