Kryetari i Partisë Demokratike, Lulzim Basha tha sot se kushdo që prek qytetarët situata do tensionohet dhe do të ketë madje edhe deri thyerje xhamash dhe shpim gomash. Si pasojë e kësaj deklarate të bërë nga kreu i Partisë Demokratike janë shtuar masat e sigurisë përpara Kryeministrisë. Këto masa shtesë janë marrë për të parandaluar ndonjë incident të mundshëm.
“Kushdo që godet qytetarët dhe protestën, do të vijë ora t’i marrim zvarrë në këtë shesh. Doni luftë, luftë do të ketë. Shpojuani gomat e makinës, thyejuani xhamat, atyre që ju ndëshkojnë pa të drejtë. Kush luan me popullin t’i bëjë llogaritë mirë, se ndryshe vala popullore do t’i fshijë nga zyrat. Kjo është një lëvizje popullore pa kthim, nuk është një manifestim partiak. Populli nuk mund të durojë më. Durimit të popullit i ka ardhur fundi, edhe durimit tonë. Boll me akte të paligjshme në kurriz të shqiptarëve, në kurriz të biznesit, por vjen momenti kur nuk do të gjeni vrimë miu për t’u futur, kur zemërata popullore të rritet. Kur ju godasin, mos ktheni faqen tjetër, por goditini me grusht. Për çdo padrejtësi goditini me grusht, koha kur populli trajtohet si dele po merr fund”, tha Basha.
Ndërkohë protesta e opozitës ka hyrë sot në ditën e shtatë përpara kryeministrisë në “Dëshmorët e Kombit”. (M.D/ Shuplaka)
