Sezoni turistik në Shëngjin ka sjellë një rritje të ndjeshme të kërkesave për shërbime shëndetësore, duke e vënë menjëherë në punë qendrën verore që nisi zyrtarisht funksionimin më 1 qershor.
Brenda pak ditësh, kjo strukturë është kthyer në një pikë referimi për dhjetëra pushues që kanë kërkuar ndihmë për shqetësime të ndryshme shëndetësore.
Sipas stafit mjekësor, numri i vizitave ditore ka arritur deri në 40, ndërsa rastet më të shpeshta lidhen me problemet që shkakton ekspozimi i zgjatur në diell, lodhja fizike, çrregullime të lehta dhe pickimet nga insekte – një fenomen i zakonshëm gjatë verës në zonat bregdetare.
Mjekja Liza Ujka thekson se stafi është i përgatitur për të trajtuar një gamë të gjerë rastesh dhe vlerëson si thelbësore ofrimin e ndihmës në kohë dhe në kushte të përshtatshme për situata urgjente.
“Jemi të angazhuar për t’i dhënë zgjidhje të shpejtë dhe efektive çdo shqetësimi shëndetësor që hasim, veçanërisht në këtë periudhë kur fluksi i pushuesve është në rritje.”- u shpreh Liza Ujka
Ndërkohë, Drejtori i Njësisë Vendore të Kujdesit Shëndetësor në Lezhë, Elson Frroku, siguron se janë marrë të gjitha masat për të garantuar funksionimin pa ndërprerje të qendrave verore shëndetësore në Shëngjin dhe Tale.
“Qendrat janë të pajisura me të gjithë logjistikën e nevojshme dhe staf të kualifikuar për të përballuar fluksin që sjell sezoni turistik.”- ka thënë mjekja.
Autoritetet shëndetësore u bëjnë thirrje pushuesve që të jenë të kujdesshëm ndaj faktorëve të jashtëm, si rrezet e diellit apo konsumimi i ushqimeve të pakontrolluara, dhe të kërkojnë menjëherë ndihmë mjekësore në rast shqetësimesh, për të shmangur komplikime të mundshme gjatë qëndrimit në zonat turistike të Lezhës.
