Aktori i humorit Julian Deda, i cili është gjithashtu anëtar i Partisë Demokratike, ka reaguar pas vendimit të Këshillit Bashkiak të Tiranës, për të rritur çmimin e ujit të pijshëm.
Deda i cili ka qenë përkrah qytetarëve dhe aktivistëve që protestuan përpara bashkisë kundër marrjes së këtij vendimi, i quan pazarxhinj të vegjël, dy anëtarët e LSI-së në Këshill, Agim Krajën dhe Genta Mezinin, të cilët votuan pro rritjes së çmimit të ujit.
“Une isha sot si qeni ne mes te qenerve, per te protestuar kunder rritjes se çmimit te ujit te pijshem. Ne listprezence per mbledhjen e keshillit bashkiak nuk ka asnje emer keshilltari te djathte. Papritur, u futen tre LSI-ist per ti dhene nje dore Lali €rit duke i plotesuar kuorumin e nevojshem. Beri shume mire partia e tyre, qe u distancua, por a ka vlere kjo? Tashme çmimi do rritet dhe per kete duhen falenderuar pazarxhijte e vegjel. P.s. Yyytttt…!”, shkruan Deda.
Kujtojmë se mbledhja e sotme nuk filloi në orarin që ishte përcaktuar, pra në 18:00, por rreth 50 minuta më vonë. Për këtë arsye këshilltarët e LSI-së ishin larguar nga salla, duke lënë të pranishëm vetëm këshilltarët e PS-së, PDIU-së dhe 1 të FRD-së si edhe ata të PD-së.
Kreu i Këshilltarëve të PD-së, Leonard Olli bashkë me këshilltarët e tjerë të kësaj force politike u larguan nga salla ku po zhvillohej mbledhja. Me largimin e tyre, si edhe atyre të LSI-së nuk plotësohej kuorumi për t’u zhvilluar mbledhja.
Mirëpo ndërkohë që këta debatonin, në sallë u rikthyen Agim Kraja dhe Genta Mezini nga LSI-ja. Bashkë me këta, numri i anëtarëve të pranishëm në mbledhjen e Këshillit shkonte në 31, duke plotësuar kështu kuorumin.
Rritja e çmimit të ujit u votua me të gjitha votat e të pranishmëve, 25 anëtarëve të PS-së, 3 të PDIU-së, 2 të LSI-së dhe 1 të FRD-së. (D.D/Shuplaka)
