Rruga e Arbrit, 3 KOMPANI paraqesin ofertat por me probleme, ”Gjoka Konstruction” kërkon 33,6 miliardë lekë

Ndërsa Rruga e Arbrit u premtua me bujë në fushatën elektorale dhe u kërkua me ngulm nga banorët, duket se socialistët kanë menduar të nisin me procesin e marrjes së ofertave.

”Në mjediset e Ministrisë së Infrastrukturës dhe Energjisë u mblodh sot më datë 02.10.2017, Komisioni i dhënies me koncesion të procedurës me objekt “Përmirësimi, ndërtimi, operimi dhe mirëmbajtja e Rrugës së Arbrit. Në përputhje me përcaktimet ligjore, brenda afatit ligjor 60 ditor, komisioni do të kryejë shqyrtimin e plotë dhe të detajuar të ofertave të paraqitura dhe do të dalë me vendimmarrjen përkatëse.”, bëjnë me dije ekspertët e ministrisë.

Po cilat janë 3 kompanitë që kanë paraqitur ofertë? Ato janë ”Adem Pojani”, ‘Alb-Star” dhe ”Gjoka Konstruction’‘. Kompanitë kanë patur probleme, diku me mungesë dokumentesh dhe diku tjetër me mungesë oferte. Vetëm ”Gjoka” ka paraqitur listën e dokumenteve të kërkuara dhe një ofertë prej 33.6 miliardë lekë.

DETAJET:

1)    Operatori Ekonomik Adem Pojani

Nga shqyrtimi paraprak i sistemit, rezultoi se ky operator kishte paraqitur disa dokumenta, të cilat nuk rezultojnë të mjaftueshme për t’u konsideruar ofertë zyrtare;

2)    Operatori Ekonomik Shoqëria “Alb-Star”sh.p.k.

Nga shqyrtimi paraprak i sistemit, rezultoi se ky operator kishte paraqitur disa dokumente, por nuk u konstatuan të dhënat e ofertës financiare.

3)    Operatori Ekonomik Shoqëria “Gjoka Konstruksion” sh.a;

Nga shqyrtimi paraprak i sistemit, rezultoi se ky operator kishte paraqitur dokumentacionin teknik, financiar dhe ligjor si dhe kishte paraqitur Propozim Financiar. Nga shqyrtimi paraprak i Propozimit Financiar rezultoi se Operatori Ekonomik Shoqëria “Gjoka Konstruksion” sh.a; kishte propozuar si vlerë projekti shumën prej 33,6 miliardë lekë.

Mbetet për t’u parë se çfarë vendimi do të marrë komisioni dhe nëse do të nisë një procedurë të re pas këtij dështimi spektakolar. (V.G/SHUPLAKA)

[ngg_images source=”galleries” container_ids=”2880″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]