Kryeministri Edi Rama është shprehur se debati për tarifën në ‘’Rrugën e Kombit” është një debat që nuk ja vlen të bëhet. Ai tha se mirëmbajtja e rrugës ka koston e saj që nuk mund të mbulohet nga të gjithë taksapaguesit shqiptar.
“Debat që nuk ja vlen, ka një anë që ecën në rrugën e arsyes dhe ka një anë tjetër që harron se çfarë ka thënë deri më tani.
Kjo nuk është taksë, po është tarifë për përdoruesit, e ka zanafillën në vitin 2010, se pikërisht në këtë vit kryeministri i kohës (Berisha) ka marrë iniciativën për të hapur këtë proces. Ka thënë diçka që sot e mohon ‘’ne e ndërtuam po e kemi të pamundur që ta mirëmbajmë”.
Mungesa e mirëmbajtjes ka sjellë probleme të shumta të degradimit, rrëshqiti këtu, ra atje, u përmbys më tutje. Historiku është fare i qartë, pasi qeveria e mëparshme e kuptoi që deri më tani kjo rrugë u ka kushtuar shqiptarëve 1.4 miliardë dollarë, procesi dështoi.
Më pas ne e rimorëm procesin, dhe e kemi marrë që në 2014, me urdhërin e nxjerrë nga ish-ministri Haxhinasto, u deshën dy vite kohë, deri në finalizimin e procesit në fund të 2016-tës. Dhe nuk pati asnjë debat, këtu nuk po flas për LSI-në, pasi kjo parti dihet se çfarë qëndrimesh mban kur është në pushtet, dhe kur është në qeveri.
Rrugës së Kombës ia dimë dhe historinë, ja dimë dhe të pandehurit që janë këtu në sallë sot. Kjo është një rrugë e papërfunduar, ku nuk janë bërë as studimet e duhura. Formula që ju keni ”ndërto dhe mos mendo për mirëmbajtjen” është formula e rrumpallës.
Për përdoruesit e shpeshtë do të negociohet me kompaninë, dhe do të ketë zgjidhje me karta, duke paguar një tarifë fikse. Këto janë mënyrat sesi aplikon bota e qytetëruar, pasi nuk do të rrimë të lutemi që gurët të mos i bienë në kokë ndonjë kalimtari në rrugë”, u shpreh Rama.
(E.K/FAXWEB)
