Rrugorët në aksion për rripin e sigurisë tek fëmijët, procedohen 245 drejtues mjetesh

245 drejtues mjetesh janë gjobitur nga policia pasi janë kapur duke drejtuar mjetin pa rripin e sigurimit ose pa sistemin e fiksimit për fëmijët nën 12 vjeç.

Gjatë kontrollit policia ggjithashtu ka arrestuar shtetasin A.A., i cili po drejtonte mjetin pa vendosur rripin e sigurisë.

47 vjeçari u përpoq të korruptonte një prej agjentëve të policisë, me qëllim që të evitonte ndëshkimin.

Kontrollet e policisë janë zhvilluar në veçanti pranë institucioneve arsimore, ku edhe shihet numri më i madh i drejtuesve të automjeteve, të cilët shkelin rregullat rrugore.

Njoftimi: 

“Tiranë

Me qëllim parandalimin e pasojave që vijnë si rezultat i mospërdorimit të rripit të sigurisë dhe sistemeve të fiksimit për pasagjerët nën 12 vjeç, rrugorët e kryeqytetit kanë shtuar kontrollet dhe patrullimet me përzgjedhje, veçanërisht në afërsi të shkollave dhe institucioneve të tjera arsimore dhe vetëm përgjatë 3 ditëve të fundit janë konstatuar dhe proceduar administrativisht për në Organin Administrativ Shtetëror Tiranë 245 drejtues mjetesh.

Gjithashtu, gjatë kontrolleve në funksion të parandalimit, nga rrugorët e kryeqytetit është arrestuar në kushtet e flagrancës, për veprën penale “Korrupsioni aktiv ndaj personave që ushtrojnë funksione publike”, shtetasi me iniciale A. A., 47 vjeç, pasi u konstatua duke drejtuar mjetin pa vendosur rripin e sigurisë, i cili me qëllim shmangien e ndëshkimit i ofroi agjentit verifikues një shumë lekësh.

#ZbatoRregullateQarkullimit

#StopVeprimeveKorruptive

#BashkëpunoEdheTiPërSigurinë”