Radio Televizioni Shqiptar këtë vit ka vendosur të bëjë publike 22 këngët që do të marrin pjesë në edicionin e 56 të Këngës në RTSH. Njëzet e dy këngët në garë do të transmetohen jo vetëm në programet e Radio-Tiranës, por edhe në rrjetin e radiove që i janë bashkur festivalit këtë vit.
Të gjitha këngët që do të konkurrojnë për çmimin e parë në Festival janë publikuar në faqen zyrtare të RTSH-së në ‘Youtube’.
Festivali i Këngës do të zhvillohet këtë vit më 21, 22 dhe 23 dhjetor, në Pallatin e Kongreseve, në Tiranë
Njoftimi i RTSH-së
Bashkë me dhjetorin vjen edhe edicioni i 56-të i Këngës në RTSH, që tashmë gjendet në fazën e tij përfundimtare.
Sapo kanë përfunduar klipet prezantuese për të njëzet e dy këngët e garës muzikore më të madhe në vend, të cilat këtë vit do të jenë të aksesueshme në faqen zyrtare të Radio Televizionit Shqiptar, ëëë.rtsh.al, si edhe në kanalin zyrtar të RTSH-së në youtube. Në këtë mënyrë publiku do të jetë i njohur me këngët përpara tri netëve të mëdha të festivalit, live nga Pallati i Kongreseve, në prag të Krishtlindjes, në datat: 21, 22, 23 dhjetor.
Njëzet e dy këngët në garë do të transmetohen jo vetëm në programet e Radio-Tiranës, por edhe në rrjetin e radiove që i janë bashkur festivalit këtë vit, si Club FM, IN Radio, City Radio, NRG Radio dhe MCN Radio.
Duke qenë se IN, CITY dhe MCN janë edhe platforma televizive muzikore, do të prezantohen aty edhe klipet e realizuara me qëllim promovimin e këngëve të këtij Festivali.
Kjo mënyrë prezantimi vlen vetëm për familjarizimin e opinionit publik me këngët dhe nuk kanë asnjë ndikim për këngën fituese të Festivalit.(M.Q/Faxweb)
Discussion about this post