Radio Televizioni Shqiptar u bën të ditur partive politike se nuk do të pranojë kasetat e gatshme të partive politike për pasqyrimin e fushatave elektorale në kuadër të zgjedhjeve parlamentare të 25 qershorit.
Përmes një shkrese të posaçme që u drejtohet kryetarëve respektivë të partive politike, e argumenton këtë vendim me ruajtjen e profesionalizmit dhe informimit të paanshëm të publikut. Gjithashtu, në të, RTSH kërkon atashimin e gazetarëve të saj për aktivitetet ditore që partitë politike në vend do të zhvillojnë.
Më tej, bëhet me dije se Njësia e Lajmeve në RTSH vetofrohet për çdo kontakt që zyrat e shtypit do të duan të kenë për të rakorduar aktivitetet e fushatës zgjedhore. Duke e cilësuar praktikën e shpërndarjes së materialeve të gatshme si shqetësuese, shkruan se kjo praktikë kufizon pluralizmin në media dhe lirinë editoriale.
(XH.A/SHUPLAKA)
