Partia Socialiste ka mbledhur mëngjesin e sotëm Kryesinë e saj, ku është diskutuar dhe për seancën që do të mbahet nesër në Kuvend.
Burime bëjnë me dije se seanca do të nisë rreth orës 10:00, ndërsa nga frika e protestës Ministrisë së Brendshme të drejtuar nga Sandër Lleshaj i është kërkuar që të garantojë sigurinë fizike të deputetëve.
Në seancën e paradites së nesërme do të bëhet betimi i 4 deputetëve të rinj që do marrin sot mandatin në KQZ, të cilët i përkisnin listave të LSI-së.
Po ashtu në mbledhjen e kryesisë së socialistëve është diskutuar për përgatitjet e Kongresit zgjedhor të 23 marsit.
Duke ditur orën e seancës, tashmë opozita me siguri ka nisur dhe përgatitjet e protestës.
Kush janë 4 LSI-stat që marrin sot mandatin në KQZ dhe betohen neser ne Kuvend:
Aurora Mara ishte kandidate e LSI-së në Qarkun e Dibrës për zgjedhjet parlamentare të vitit 2017. Ajo ishte e dyta në listë pas ish-deputetit Përparim Spahiu, i cili ishte edhe udhëheqësi i Lëvizjes Socialiste për Integrim në Qarkun e Dibrës.
Aurora Mara prej disa vitesh ka mbajtur detyrën e përgjegjëses së sektorit në Ministrinë e Infrastrukturës, detyrë të cilën e ka ushtruar edhe pas zgjedhjeve parlamentare të vitit 2017.
Në listën e kandidatëve të LSIsë për Qarkun e Tiranës ishin dy persona që plotësuan formularin e dekriminalizmit, duke i hapur rrugë marrjes së mandatit të deputetit. I pari ishte Ylli Shehi, i cili u zgjodh deputet për herë të parë në vitin 2013 nën siglën e Partisë Republikane të udhëhequr nga Fatmir Mediu.
Por para zgjedhjeve vendore të vitit 2015, ai kaloi me LSI-në, gjë e cila krijoi besimin për ta rikandiduar edhe në zgjedhjet parlamentare të vitit 2017. Ai ishte i renditur i 8-ti në listën e LSIsë për Qarkun e Tiranës për vitin 2017 dhe tanimë pritet të bëhet deputet.
Kandidati tjetër nga LSI në Qarkun e Tiranës ishte Edmond Rrushaj, i cili ishte i pozicionuar i nënti në listën e kandidatëve të Lëvizjes Socialiste për Integrim për zgjedhjet parlamentare të vitit 2017.
Edmond Rrushaj ka mbajtur më përpara detyrën e drejtorit të QSUT-së.
Enver Roshi, kandidati tjetër, i cili do të marrë detyrën e deputetit nga radhët e LSI-së, ka mbajtur më parë detyrën e drejtorit të Institutit të Shëndetit Publik si edhe të dekanit në Fakultetin e Mjekësisë.
(E.K/FAXWEB.AL)
