Kreu i Kuvendit Gramoz Ruçi ndryshe nga Edi Rama që i quan zaptues profesionistë, thotë se e ndjen mirë situatën që po kalojnë banorët e Astirit, pasi dhe ai vetë e ka ndërtuar shtëpinë e tij me shumë mund.
Ruçi shprehet se banorët e Astirit po paguajnë dënimet e politikës së këtyre 28-viteve, por qeveria e PS-së nuk mund të dalë kundër ligjit duke i shpronësuar ata.
“Unë e ndjej fort se çdo të thotë të prishet shtëpia, me apo pa leje, sepse jam një si ata… jam fshatar që edhe unë gjatë viteve të gjata të jetës kam bërë shtëpi me duart e mia, dhe kimetin shtëpisë ia di ai që ka pak lekë dhe vetë e bën, por do t’u thosha: miqtë e mi gabimi që bëj unë dhe ti si familjarë, e paguajnë fëmijët tanë, ndërsa gabimet që bën politika, e paguan gjithë shoqëria.
Dhe ata fatkeqësisht po paguajnë gabimet e politikës, të djeshme dhe të sotme. Sepse ata ndryshe flasin kur janë në pushtet dhe ndryshe kur janë në opozitë.
Apeli im do të ishte: Kjo marri 28 vjeçare duhet të marrë fund. E dyta: Asgjë nuk zgjidhe në rrugë jashtë ligjit dhe jashtë ligjit të së drejtës, por zgjidhet në bashkëpunim me institucionet, dhe siç ka thënë shteti, do të shihen të gjitha objektet një për një.
Ato që janë legalizuar do të dëmshpërblehen, ndërsa ato që nuk janë legalizuar do t’u gjendet zgjidhja dhe hapësira sa e lejon ligji. Qeveria e PS nuk mund të shkelë ligjin”, u shpreh Ruçi.
Kujtojmë se etiketimet që kryeministri Rama iu ka bërë banorëve që Ruçi i quan viktimë të politikës së gabuar kanë qenë nga më të ndryshmet si: zaptues profesionistë, mashtrues, shkelës së ligjit, mish për top etj.
(E.K/FAXWEB.AL)
