Rumania ka miratuar një ligj të ri që autorizon forcat e saj të armatosura të rrëzojnë mjetet ajrore pa pilot që hyjnë ilegalisht në hapësirën ajrore të vendit, si pjesë e përpjekjeve për të përballuar rrezikun në rritje nga dronët rusë që kanë rënë në territorin rumun, pranë kufirit me Ukrainën.
Ligji, i nënshkruar të hënën nga presidenti në detyrë Ilie Bolojan, erdhi pas miratimit nga parlamenti në muajin shkurt, në përgjigje të një vale incidentesh ku dronë rusë, me objektiv Odesën në Ukrainë, kanë devijuar dhe kanë përfunduar në Rumaninë fqinje – një vend anëtar i NATO-s. Edhe pse nuk ka prova se Rumania është qëllimisht në shënjestër, këto episode kanë ngritur shqetësime për sovranitetin ajror dhe sigurinë kombëtare.
Ligji parashikon që çdo dron që futet pa leje në hapësirën ajrore rumune të identifikohet, të kontaktohet, dhe nëse nuk reagon ose sillet në mënyrë agresive, mund të shkatërrohet. Rrëzimi mund të kryhet vetëm pas përpjekjeve për ndërprerje dhe paralajmërimeve të nevojshme.
Krahas këtij ligji, është miratuar edhe një tjetër që rregullon mënyrën e kryerjes së misioneve dhe operacioneve ushtarake paqësore brenda territorit të Rumanisë. Vendimi i Rumanisë mund të ndikojë edhe në politikat e vendeve të tjera të NATO-s, ndërsa rritet shqetësimi për sigurinë rajonale dhe për zbatimin e Nenit 5 të mbrojtjes së përbashkët të aleancës.
