Pavarësisht refuzimit nga Volodymyr Zelensky, Rusia konfirmon qëllimin e saj për të respektuar një armëpushim tre-ditor në Ukrainë, nga 8 deri më 10 maj, si pjesë e festimit të 80-vjetorit të fitores së Bashkimit Sovjetik në Luftën e Dytë Botërore.
Zëdhënësi i Kremlinit, Dmitry Peskov, tha gjatë një takimi me gazetarët se nisma e armëpushimit mbetet e rëndësishme dhe se urdhrat përkatës janë dhënë tashmë nga Vladimir Putin.
“Iniciativa e Presidentit Putin për një armëpushim të përkohshëm gjatë festave mbetet e rëndësishme dhe urdhrat përkatës janë lëshuar tashmë”, tha ai.
Megjithatë, Peskov sqaroi se Rusia rezervon të drejtën për t’u përgjigjur nëse, siç tha ai, “regjimi i Kievit nuk bën të njëjtën gjë” dhe vazhdon të godasë pozicionet dhe objektet ruse.
“Pala ruse do të pushojë zjarrin, por nëse regjimi i Kievit nuk përgjigjet dhe vazhdon të përpiqet të godasë pozicionet dhe infrastrukturën tonë, atëherë do të ketë një përgjigje të menjëhershme”, theksoi ai.
Kujtojmë se presidenti ukrainas e përshkroi propozimin e Moskës për armëpushim si një “shfaqje teatrale”, duke vënë në pikëpyetje qëllimet e vërteta të Kremlinit dhe duke hedhur poshtë çdo marrëveshje për ndërprerjen e armiqësive pa garanci.
