Një foto e trishtë, që të sjell ndjesinë e revoltës për cilindo që e sheh, edhe pse në distancë. Teksa Llogaraja është përfshirë nga flakët, po kështu edhe pyjet e Pogradecit, duket se të njëjtin fat ka edhe Pylli i Sodës në Vlorë.
Por pas kësaj fotoje, siç e thotë gazetari Ergys Alushi, duket se fshihet diçka më e madhe.
I kontaktuar nga ”Shuplaka” Alushi shpreson që dora që po e djeg të ndalet.
”Sa keq! Pylli i Sodës. I ka mbetur vetëm emri, në disa zona. Punuan breza vlonjatësh që e rritën dhe e mbrojtën. Mbrojtësi natyror i qytetit të Vlorës.
Thonë se po e bëjnë gati si tokë për ndërtim! A mban njeri përgjegjësi për këtë katastrofë kur mendon se është në juridiksionin e Bashkisë Vlorë?!”, shkruan i indinjuar Alushi, duke shtuar me ironi se me siguri ka mbaruar muaji i dëgjesave publike.
”Pylli nuk është as i PD-së e as i PS-së e as i “tepsisë”, por i qytetit!
Mbase nuk na mërzitet kryetari i bashkisë apo ata që do ia thonë se në fund të fundit për të mirën e tij është, nëse e kupton ndryshimin midis servilit që e rrethon dhe atij që e kritikon për mirë!
Se jo për gjë, por foli dhe kryeministri për perfomancë të dobët të pushtetit vendor dhe unë i besoj kryeministrit tim!”, përfundon Alushi. (V.G/SHUPLAKA)
Discussion about this post