Sa kushtojnë 5 ditë në Kanë? Përgjigjet Aurela Hoxha. Zbulon dhe projektin e ri në televizion

Aurela Hoxha ishte një nga modelet shqiptare pjesë e festivalit të Kanës. Për të dytin vit radhazi, qëllimi i Aurelës për të marrë pjesë në një event kaq të rëndishëm ka qenë mbrëmja gala AmFar, një prej eventeve më të mëdha dhe më të rëndësishme në botë për mbledhjen e të ardhura për bamirësi.

E ftuar në emisionin e pasdites te Rudina Magjistari, Aurela ka treguar si e ka gjetur veten mes modeleve më të famshme të botës.

“AmFar është një nga organizimet më të veҫanta, ka edhe të tillë të ngjashëm, por ky i Kanës është më i rëndësishmi i vitit…”, thotë ndër të tjera ajo.

Tregues për këtë, shton Aurela, është edhe fakti që ditën kur mbahet festa gala, rreth zonës ku zhvillohet eventi, rruga është 7 km e bllokuar me makina edhe për shkak të njerëzve të famshëm që vijnë nga të katër anët e globit. Ajo tregon se pjesëmarrjen në këtë event e sheh si një mundësi për të marrë oferta të tjera nga kompani ndërkombëtare.

“Për mua është shumë e rëndësishme kjo pjesëmarrje. Vitin e kaluar, p.sh, pas këtij eventi mora një ofertë për të qenë pjesë e një filmi. Përveҫ kënaqësisë, këto evente më ndihmojnë për të krijuar kontakte. Është një derë e hapur që të jep një mundësi, nëse do të përfshihesh në tregun ndërkombëtar të modës, televizionit”, shprehet Aurela.

Duke qenë se vizita në këtë vend ka dhe kostot e veta, modelja ka pranuar se pesë ditë në Kanë kushtojnë jo pak.

“Të qëndrosh 5 ditë në Kanë dhe me shpenzimet e tua, është e vështirë. Kjo, për shumë arsye dhe përsa i kemi ne mundësitë për të qenë kaq të zhvilluar. Unë jam ndier me fat që kam qenë pjesë e këtij eventi. Kana është e shtrenjtë në këtë kohë, por ka edhe mundësi zgjedhjeje. Nuk është e thënë të flesh në hotel me 5 yje, mund të zgjedhës edhe më lirë se kaq. Është e kushtueshme, por jo diҫka e jashtëzakonshme, mund ta përballosh, aq më tepër kur bëhet fjalë që kjo është ëndrra ime dhe profesioni im’’, shprehet ajo.

Përsa i përket projekteve të reja, Aurela thotë se do të jetë nga shtatori pjesë e një projekti televiziv, të cilën mendon se do e bëjë shumë mirë. (E.K/SHUPLAKA)