Gazetarja e Fax News Mirilda Tili ka qenë sot me disa prej punonjësve të Albacall që prej disa ditësh kanë pasur një përplasje me kompaninë, për shkak të heqjes së bonuseve mbi pagën, çka redukton ndjeshëm të ardhurat e tyre. Një pjesë e të rinjve shprehen se vendimi nga ana e kompanisë është marrë në mënyrë arbitrare dhe ka sjellë penalizimin e shumicës prej tyre.
Në një komunikim me Fax News, një tjetër punonjës ndërkohë shprehet i kënaqur me kushtet, dhe thotë se nuk ka asnjë gjë të vërtetë në denoncimin e kolegëve të tij. Kjo ka sjellë një përplasje edhe më të madhe mes dy grupimeve, dhe duket e vështirë për të sqaruar në themel situatën.
Përveç heqjes së bonusit mbi pagën, punonjësit shprehen se kushtet në të cilat ata punojnë janë skandaloze, dhe shumë prej tyre kanë shfaqur simptoma të ankthit, për shkak të presioneve që iu bëhen për arritjen e objektivave.
“Jam punonjës i Albcall prej tre vitesh, dhe në 5 Qershor na ka ardhur një email një komunikim që do të na hiqeshin bonuset, që nënkupton një pagë më të ulët me 20%. Kemi pasur komunikim të vazhdueshëm me kompaninë, dhe iu kemi çuar edhe peticionin të cilët ndërtuam.
Pasi na kanë zvarritur për rreth 25 ditë, Inspektoriati i Shtetit ka mbajtur anën e kompanisë, duke iu bërë avokatinë atyre, ne po vazhdojmë organizimin dhe presim deklarimin e ISH-së në datën 11 Korrik.
Nëse nuk do të punonim nuk do të na mbanin, prej shtatë vitesh kompania nuk jep detajin e pagës, ne punojmë 10 ditë pa pushim, ndërkohë që Kodi i Punës e parashikon që të ketë 24 orë pushim në 7 ditë. Kushtet higjenike janë skandaloze, nuk kemi as kushtet më minimale”, shprehet një prej punonjësve të kompanisë”, shprehet një prej punonjësve.
“Unë vetë nuk kam penalizuar, ama kolegë të mi janë penalizuar më shumë se njëherë. Nuk njihet as raporti mjekësor, raporti të zbritet nga rroga, ne nuk po kërkojmë rritje, po kërkojmë atë që na është dhënë derimë sot”, tregon një tjetër punonjëse, e cila thekson se ata nuk kanë asnjë qëllim për sabotimin e punës së kompanisë.
Ndërkohë që një nga personat që ndërhyri gjatë intervistës tha se ai ishte i kënaqur me kushtet dhe bonuset kishin të bënin me vjetërsinë në punë.
“Unë kam 8 vite këtu dhe asnjë nga personat që janë këtu nuk i njoh, unë sjam punonjës në administratë, ejani ju vetë që të shihni kushtet. Unë jam i kënaqur me kushtet këtu, ndryshe do të kisha ikur që sot.”, u shpreh Armando, i cili preferoi që të mos jepte identitetin e tij të plotë.
Për shkak të kakofonisë së krijuar, do të duhet që kjo çështje të ndiqet edhe në ditët në vijim nga Fax News, pasi varet fati i më shumë se 900 punonjësve të cilët janë të punësuar pranë kësaj kompanie.
(E.K/Faxweb.al)
Discussion about this post