Safet Gjici flet troç: Ç’më thanë drejtuesit e Partizanit për 15 tifozët që pinë drogë

Presidenti i Kukësit, Safet Gjici, në një intervistë të dhënë për një të përditshme, ka komentuar ndeshjen ndaj Partizanit duke sqaruar edhe zhurmën e madhe të krijuar nga incidentet e ndodhura mes tifozëve.

Ekipi i Skënderbeut përfitoi nga barazimi i Kukësit me Partizanin, duke iu kapur në krye…
Ndaj Partizanit ishte një superndeshje, ndoshta më e bukura e kampionatit shqiptar për këtë sezon, pavarësisht se nuk prodhoi fitues dhe ndodhi ai incidenti me tifozët. Ne luajtëm shumë më mirë në 20 minutat e fundit dhe, nga momenti në moment, pritej goli, ndërsa Partizani u mbyll në portë. Besoj se tifozët e Partizanit nuk ishin korrekt. Kjo nuk është hera e parë që ata tifozë veprojnë kështu në Kukës. Ndoshta shikojnë që ekipi i tyre nuk fiton dot në fushë dhe krijojnë probleme, duke shkaktuar rrëmujë në stadium. Kjo nuk i ka hije një klubi si Partizani.

Tifozët e Partizanit kanë thënë se u goditën me sende nga jashtë stadiumit…
Pse gjithmonë i gjuajnë këta? Nuk është rasti i parë i tifozëve të Partizanit që bëjnë kështu. Keni parë ndonjëherë tifozët e Kukësit të thyejnë stola në transferta?! Në stadium ndaj Partizanit ishin 4-5 mijë kuksianë dhe nuk u krijua asnjë incident. Sherrin e nisën tifozët e Partizanit, por ndoshta mund të jenë provokuar edhe nga jashtë. Nuk kam ndonjë informacion apo provë me pamje filmike për diçka të tillë.

Në fakt, vetë klubi i kuq ka nxjerrë një video ku duken sendet që vijnë nga jashtë stadiumit në drejtim të tifozëve…
Videot që nxjerrin edhe mund t’i shpikin, nuk është çudi. Di të them që ndeshja deri në minutën e 70-të ishte shumë e luftuar nga të dyja skuadrat, nuk pati asnjë problem. Masat organizative ishin në lartësinë e duhur nga klubi ynë. Hyrja ishte pa biletë dhe prandaj erdhën kaq shumë tifozë të Partizanit. Ju them se edhe vetë drejtuesit e Partizanit u habitën se si ka mundësi që tifozët e tyre bëjnë të tilla sherre?! Madje ata aluduan për 10-15 veta që pinë drogë dhe nuk dinë çfarë bëjnë më pas. Tifozë të tillë nuk duhet që të jenë në stadium.

Incidente pati edhe në tribunën VIP, si është e vërteta?
Në tribunën VIP nuk pati probleme. Gjithçka u agravua kur tifozët e kuq nisën të thyejnë stolat dhe, në këtë moment, pati një reagim nga sektori anësor i tribunës qendrore, ku një pjesë e tifozëve nisi të ofendonte. Me drejtuesit e Partizanit nuk kemi asnjë problem. Edhe pas ndeshjes u takuam. Unë reagova ndaj tifozëve të mi dhe ata u qetësuan.