Saimir Tahiri i është përgjigjur pyetjes së çfarë donte të shprehte në lidhje me përmendjen e shpenzimeve të qeveritarëve duke thënë se ai nuk flet me mesazhe të koduara dhe se njihet për mënyrën e të shprehurit drejtpërdrejt.
“Nuk i shkoj fare historisë nëse dënohem këto janë hipoteza. Janë aq shumë hipoteza, saqë më shkon nëpërmend dënimi. S’kam asnjë kod, unë jam shumë i drejtëpërdrejt, përtoj të gënjej, e kam kollaj të them cfarë mendoj drejtpërdrejt. E përmenda atë që unë kam shpenzuar 140 euro ndërsa të tjerë 900 euro nata në hotel, sic përmenda edhe veten se më kanë akuzuar që kam përdorur hotel 1 mijë euro nata.
Unë faktoj me letër porosi nga të gjitha vendet e BE që thonë që unë nuk kam asnjë pasuri, asnjë tokë asnjë shtëpi as një makinë në ato vende, dhe nuk kam pasur shpenzime marramendëse. Kjo ishte sa për të thënë është banale, që drejtësia ka mundësi të dyshojë edhe më fortë. Edhe unë e them prap që do të kem kohë në vazhdim të flas”
“Dëgjuat argumentimin tim dhe të Maksit se sa gënjeshtra janë thënë, dhe ishin të verifikueshme nga Prokuroria dhe ju gjithashtu. Akuzohem se jam pjesë e një grupi të strukturuar kriminal dhe disa polic, që ju e patë që ata nuk kanë qenë në detyrë në kohën që akuzohen.
Kur kanë shkuar në detyrë, kanë denoncuar Habilajt dhe ky procedim penal është nisur nga policët në vartësi time dhe nga ata që sot akuzohen bashkë me mua. Është vendimi i antimafias që i dallon si të tilla këto akuza, si gënjeshtra. Janë gënjeshtra dhe sot u provuan me provat që nuk i kundërshton njeri.
E thotë edhe Prokuroria Italiane që është një gënjeshtër duke sjellë mijëra fletë prova, tani si t’ia bëj unë që Prokuroria italiane thotë janë gënjeshtra dhe kjo shqiptare thotë që ta hedhim njëherë në treg për publikun. E vërteta ime është fare e thjeshtë e provuar me letra e fakte sa askush nuk i del dot përballë. Si t’ia bëj unë që këta policët që akuzohen sot janë policë që kanë denoncuar që në 2016 Habilajt dhe këta janë pjesë e grupit? Kjo është kaq banale“, tha Tahiri.
Duke iu përgjigjur interesit të gazetarëve për çështjen e fikjes së radarëve të sigurisë, Tahiri tha:
“Teknikisht radarët nuk fiken dot, nuk ka asnjë mundësi të fiken. Prokuroria kishte 2 vjet kohë të provonte nëse fikeshin, unë them se jo dhe kam dhënë prova. Sepse siguria në Republikën e Shqipërisë nuk është lënë në dorë të një tekniku”.
https://www.facebook.com/faxweb.al/videos/898049060552136/
(F.GJ/FAXWEB/.AL)
