Presidenti serb, Aleksander Vuçiç, ka mbërritur në Tiranë, për t’iu bashkëngjitur pjesës tjetër të liderëve ballkanikë në përgatitjet për Samitin e Brdo-Brijunit.
Presidenti serb që prej paradites ka qëndruar në Romë në një vizitë zyrtare, dhe ka mbërritur në Shqipëri rreth orës 21:00.
Në Tiranë janë mbledhur liderë të tjerë ballkanikë dhe Përfaqësuesja e Lartë e Bashkimit Europian, Federica Mogherini.
Sonte ishte parashikuar që ata të kenë një darkë joformale, ndërkohë që takimet do të vazhdojnë edhe nesër.
Mogherini sot ka takuar fillinisht kryeministrin Edi Rama dhe me të kanë dalë në një konferncë për media. Të dy i janë përgjigjur kryeministrit Ramush Haradinaj për akuzat që ai ka bërë më parë.
Mogherini ka thënë se nuk ka qenë pjesë e asnjë komploti për ndarjen e Kosovës, ndërsa Rama ka pasur një përgjigje më të rëndë. “Sa pa dalë Facebooku, budallain e ka njohur vetëm shtëpia e tij”, ka thënë kryeministri shqiptar.
Në Tiranë ka mbërritur edhe presidenti i Republikës Srpska, Millorad Dodik, i cili në një prononcim për mediat ka komentuar protestën e organizuar kundër ardhjes së tij dhe të presidentit serb.
Dodik thotë se atij nuk i bën përshtypje protesta e organizuar nga dega e Lëvizjes Vetëvendosje në Tiranë dhe se aty ka shkuar për të përfaqësuar serbët e Bosnjës.
Ndërkaq samiti dyditorë në Tiranë ka si pritës presidentin e Shqipërisë, Ilir Metën, presidenten kroate Kolinda Grabar – Kitaroviq dhe presidentin e Sllovenisë Borut Pahor.
Burimi, Express
Discussion about this post