Samiti që do të mbahet në Tiranë mes liderve të BE dhe vendeve të Ballkanit Perëndimor: Qershia mbi tortë, askush nuk mund ta imagjinonte disa vite më parë

Kryeministri, Edi Rama ka ndarë njoftimin e bërë nga presidenti i Këshillit Europian, Charles Michel, mbi samitin që pritet të mbahet në 6 dhjetor në Tiranë ku do mblidhen liderët e Bashkimit Europian dhe vendeve të Ballkanit Perëndimor.

Rama shkruan në facebook, se askush nuk e mendonte disa vite më parë se liderët e BE do të zbrisnin në Tiranë për samite të cilat gjithmonë mbaheshin në Bruksel.

Postimi i Plotë nga Edi Rama:

Presidenti i Këshillit Europian, Charles Michel, ka bërë publik vendimin e mirëseardhur për organizimin më 6 dhjetor, në Tiranë, të Samitit BE-Ballkani Perëndimor. Nuk besoj se mund ta imagjinonte kush deri disa vite më parë, që tërë liderat e BE-së do të zbrisnin në Tiranë, për një punë që gjithnjë është bërë në Bruksel. Por sot Tirana nuk është më ajo e deri disa viteve më parë, po është kryeqyteti i një vendi të respektuar në politikën ndërkombëtare, si edhe një qytet i ri europian tërheqës për zhvillimin e tij mbresëlënës.

Për historinë e marrëdhënieve ndërkombëtare të Shqipërisë kjo është një ngjarje absolutisht historike. Për Tiranën kjo është ngjarja më e madhe ndërkombëtare e historisë së saj. Për vitin 2022 që po shkon drejt përfundimit, kjo ngjarje është qershia mbi tortë pas kulmit të bukur të Finales së UEFA Conference League shtëpinë e kuqezinjve. Ndërsa për mua dhe qeverinë shqiptare, organizimi në Tiranë i një samiti të liderëve të Bashkimit Europian&Ballkanit Perëndimor është fruti më i bukur, i përpjekjes për afirmimin e Shqipërisë, si një zë i respektuar dhe anëtar dinjitoz i bashkësisë ndërkombëtare