Deklarata e ministrit të Brendshëm Sandër Lleshaj ditën e sotme gjatë mbledhjes së Komisionit të Sigurisë, se punonjësit mbi 55-vjeç në radhët e Policia së Shtetit, Gardës së Republikës dhe Shërbimit për Çështjet e Brendshme dhe Ankesat do të lirojnë vendet e tyre të punës, duket se është në kundërshtim me atë çfarë parashikon ligji shqiptar.
Në kreun lV mbi liritë dhe të drejtat ekonomike, sociale dhe kulturore, Neni 49 pika 1 dhe 2 e tij parashikojnë si më poshtë:
1. Secili ka të drejtë të fitojë mjetet e jetesës së tij me punë të ligjshme, që e ka zgjedhur ose pranuar vetë. Ai është i lirë të zgjedhë profesionin, vendin e punës, si dhe sistemin e kualifikimit të vet profesional.
2. Të punësuarit kanë të drejtën e mbrojtjes shoqërore të punës.
Por si e argumenton ministri i Brendshëm propozimin që me sa duket ka ndërmend ta bëjë fakt të kryer?
Lleshaj tha se po hartohet një projektligj, që të reduktohet mosha e madhe punonjësve të policisë, ku sipas tij,në vendin tonë është 45.1 vjet, më e madhja në Rajon.
“Policisë së Shtetit i duhet që të përballojë detyrën që i kërkohet, i duhet edhe përgatitje e mirë fizike. Për rrjedhojë kjo lidhet edhe me moshën e punonjësve të policisë. Mosha mesatare e policisë shqiptare është relativisht e lartë e krahasuar me vendet e rajonit tonë. Mosha mesatare e policisë shqiptare është 45.1 vjet. Kjo ka qenë arsyeja që ne kemi studiuar të gjitha mundësitë dhe kemi arritur ti dorëzojmë Kuvendit një projekligj që ka për qëllim çështjen e moshës në Policinë e Shtetit. Duhet që për ato që të largohen të garantohen kushtet e një jetë dinjitoze.
Nga radhët policisë të largohen ose me kërkesën e vetë punonjësit të policisë ose me vendim të autoriteteve drejtuese të saj, punonjësit e policisë që kanë mbushur moshën 55 vjeç, ose që kanë plotësuar 30 vite shërbim në radhët e policisë. Sot ne kemi në nivelin bazë të policisë oficerë që janë mbi 50 vjeç, në gradat e ulëta, në grada nënkomisar, grada e inspektorëve, që janë 60 vjeç. Synimi është që të preket kjo fashë e gradave, njerëz që janë në terren, njerëz që duhet se s’bën të lëvizin. Pas largimit nga radhët e policisë, këta punonjës të shtetit parashikohet të trajtohen financiarisht me 50% të pagës neto” – tha Lleshaj.
“Duhet që për ata që largohen të garantohen kushtet e një jetë dinjitoze”, thotë ministri, por se si do të bëhet ka zero koment përveçse do të trajtohen me 50% të pagës neto trajtim financiar, dhe se sa paguhe një polic e dimëtë gjithë, siç dimëse sa i bie gjysma e pagës së tij.
Paramendojeni vetë, një person në kulmin e moshës aktive për punë, të marrë një gjysmë pagë punonjësi policie përgjatë gjithë jetës së tij pasi jep ‘dorëheqjen’, ndërsa 55-vjeçari i liruar i Lleshajt kalon pjesën tjetër të jetës me “lëmoshën” e shtetit.
Më tej Lleshaj thotë se, “Nga radhët policisë të largohen ose me kërkesën e vet punonjësit e policisë ose me vendim të autoriteteve drejtuese të saj, punonjësit e policisë që kanë mbushur moshën 55 vjeç, ose që kanë plotësuar 30 vite shërbim në radhët e policisë”.
Pyetjet që ngrihen në këtë rast janë se ku bazohet një vendim i tillë, në cilin ligj apo nen të Kushtetutës së Republikës së Shqipërisë? Ç’është ky propozim ku nëse nuk jep dorëheqjen vendimin për ‘dorëheqejn’ mund ta marrin eprorët? Ka më vend pas kësaj të konsiderohet ‘dorëheqje’ nëse një efektiv mbi 55-vjeç që nuk pranon largimin nga detyra dhe i përmbush kriteret fizike dhe ligjore, por që ‘shefi’vendos largimin e tij?
Që komisarët e Llashajt pas miratimit të këtij projektligji nëse ndodh do të jenë të rinj, kjo as nuk diskutohet, por në diskutim është fakti nëse ky vendim është marrë për të përgatitur “komisarë” besnikë!
(F.GJ/FAXWEB.AL)
